La Banda Gaites Noega celebra’l so venti aniversariu cola interpretación d’un poema sinfónicu en Xixón

La Plaza Mayor de Xixón va acoyer esti miércoles, a partir de les 21 hores, la interpretación del ‘Poema sinfónicu Noega pa banda de gaites, quintetu instrumental y recitador’. Esta actividá ta enmarcada diento la Selmana Grande xixonesa.
 
Anabel Santiago va ser la encargada de poner voz al poema sinfónicu, mentes qu’Eduardo G. Salueña (teclaos), Héctor Braga (vigulín, violonchelu, arpa, zanfona y voz), Eva D. Toca (batería), Dani Álvarez (gaita, flauta y bouzouki) y Horacio A. García (contrabaxo) conformen el quintentu que va acompañar a la Banda Gaites Noega nesta actuación especial pa conmemorar los venti años de vida de la formación. Una combinación musical destacada, a la qu’hai que sumar la collaboración de la Banda Gaites Llariegu y el grupu de baille tradicional de Fitoria, qu’invita a disfrutar d’un espectáculu especial esta nueche na Plaza Mayor xixonesa.
 
Amás de la interpretación d’esta creación de la Banda Gaites Noega, la formación va entregar, como ye vezu, los premios del IX Concursu de Gaita de Xixón. Los ganadores d’esta edición son Jorge Suárez Carvajal (solista adultu), Arsenio Ruiz y Hugo Noval (gaita y tambor), Diego Malagás Palacio (solista infantil) y Pablo González-Merino y Daniel González (pareya instrumental).