La Banda Gaites Candás inaugura una esposición sobre’l so “pasáu, presente y futuru”

La Casa de la Cultura de Candás acueye dende esti vienres y hasta’l 8 de xineru la esposición ‘Pasáu, presente y futuru de la Banda Gaites Candás’. Nella van poder vese semeyes, vidios, traxes, preseos y el troféu de campeón de la Liga Galega.
 
“Ye una esposición mui guapa que va sorprender, n’especial a la xente de Carreño”, esplica José Manuel Fernández Rancaño, presidente de la Banda Gaites Candas, agrupación con más de 20 años de vida que celebra con esta muestra’l títulu de campeón na lliga de gaites más prestixosa del Estáu y el decimoquintu aniversariu del Festival de Bandes de Gaites Villa de Candás, decanu d’estos certamenes, que se celebró’l 22 y 23 de xunetu pasáu. Dividida en trés bloques, los visitantes van poder contemplar semeyes de toos estos años, tanto d’actuaciones per Asturies como de los munchos viaxes fechos per Europa, América y Palestina, amás de los trofeos algamaos na so trayeutoria.
 
Otra parte de la esposición ye la dedicada a los traxes, cola muestra de los dos tipos distintos que tuvo la banda na so historia, xunto colos instrumentos, que nun sólo van poder ser vistos: la Banda Gaites Candás va poner a disposición de los visitantes una gaita mi-di pa que’l públicu pueda prebala. Por último, va haber un tercer bloque formáu por vídeos y recuerdos, ente los que destaquen semeyes feches por persones que nun tienen rellación cola banda y que cedieron les sos fotografíes pa la muestra.
 
Como complementu a la esposición, estos díes la Banda Gaites Candás va poner en marcha aules didáutiques pa tolos escolinos y escolines del conceyu. Esta actividá, qu’otros años consistía na visita de los instructores de gaita y percusión de la Banda a los centros escolares, va convertise nuna visita a la muestra, onde los neños y neñes van poder conocer la historia de l’agrupación y tener la so primera toma de contautu colos instrumentos. Tamién van entamase actuaciones musicales, como la de La Bandina –nome que recibe l’agrupación de los alumnos y alumnes de la Escuela de la banda–, prevista pal vienres 23 a les 19.30 hores; y la de los mayores, el vienres 30 a la mesma hora. Amás, el sábadu 7 de xineru, a les 19.30 hores, va proyeutase un videu-documental entituláu ‘Pasáu, presente y futuru’, con entrevistes a xente venceyada a la banda, como miembros, ex componentes o escolinos, ente otros.
 
Esta tarde va celebrase la inauguración de la muestra a les 20 hores nun actu nel que van tar presentes Fernández Rancaño; Ángel Riego, alcalde de Carreño; y Amelia Fernández López, conceyala de Cultura, pa depués celebrar una espicha popular. Enantes, a les 19.30 taba previstu un pasucais de la banda, anque’l mal tiempu pue obligar a suspendelu. Nesti casu, treslladaríase a otra xornada.
 
“Llevamos una selmana montando la esposición y la xente que pudo vela mientres trabayábamos quedó mui impresionada. Son 20 años y, paez que non, pero cuando los pones enrriba la mesa, pesen”, esplica’l presidente de la Banda Gaites Candás, que convida a tolos vecinos y asturianos a visitar la Casa de la Cultura de Candás estos díes. L’horariu d’apertura de la muestra ye de 19 a 21 hores, de llunes a sábadu, y de 12 a 14 hores y de 18 a 21 hores, domingos y festivos.