La Banda Gaites Camín de Fierro festexa diez años de vida con un discu y un conciertu nel Filarmónica

’10 años nel camín’ ye’l nome del discu qu’edita la Banda Gaites Camín de Fierro con mótivu del so décimu aniversariu. El domingu va presentalu con un conciertu nel Teatru Filarmónica d’Uviéu con collaboraciones especiales.

Nacida nel 2002 de la mano de la Escuela de Música Tradicional de la Mancomunidá de los Valles del Osu, qu'abarca los conceyos de Santu Adrianu, Proaza y Teberga, esta banda gaites garra’l nome de la vía férrea construyida a mediaos del sieglu XIX pa tresportar el carbón dende les mines de Proaza y Teberga a Trubia, camín tresformáu anguaño na Senda l’Osu. Nesti tiempu, Camín de Fierro actuó de manera habitual nos conceyos de la zona y tamién tuvo salides hasta otros puntos del país y de fuera de les nueses llendes. Asina, tien tocao nel Festival de la Danse Bretonne et de la Saint Loup, celebráu na localidá bretona de Gwengamp o nel Festival de Confolens (Estáu francés), onde la banda tuvo l'honor de compartir escenariu col gaiteru gallegu Carlos Núñez. Camín de Fierro tamién evolucionó na so indumentaria, tres pasar a tocar de cai nes so anicios a utilizar un traxe tradicional nel que predominen el negru, el verde y l’encarnáu, y no musical. El repertoriu de pieces tradicionales asturianes completóse con otres bretones, pieces de bandina o cantares contemporáneos de rock como’l ‘Local hero’ que fixera popular Dire Straits.

Nel conciertu del Filarmónica, la banda de la zona de los Valles del Osu va intepretar los cantares d’un discu que “quier enseñar el trabayu diariu como banda de gaites n'estáu puru”, espliquen dende la formación. «Como nun facemos diez años nin grabamos un discu tolos díes, fomos quién a que nos acompañaren nesta aventura unos músicos y artistes de luxu. Con ellos esperimentemos otros  rexistros non tan habituales pa nós y, d'esta manera, un poco menos de la metá del discu ta dedicáu a versionar tanto temes propios de gaita esportaos a otros estilos como temes d'otros estilos importaos a la gaita», continúen. Anabel Santiago, l’acurdionista de Felpeyu Xosé Nel Expósito y el grupu Pandereteres de Fitoria son los artistes que van acompañar a Camín de Fierro sobre les tables del teatru uviedín. El conciertu va principiar a les 19.30 hores y la entrada ye llibre hasta completar l’aforu.