La banda de rock esperimental Melandru asoleya’l so discu de debú

Dos años depués de la so fundación, el primer discu de Melandru ye una realidá. La banda de rock esperimental de Villaviciosa saca a la venta’l trabayu esti vienres, tres presentar el so primer cenciellu ‘Dios tecnolóxicu’, y yá prepara xira de presentación pa xunu.

El discu, homónimu, contién alredor de media hora de composiciones propies de rock esperimental, con influencia especial del post-rock. Cinco temes en llingua asturiana, grabaos y mezclaos nos estudios OVNI por Pablo Martínez, nos qu’Iyán Ploquin (voz y guitarra eléctrica), Xuan Cortés (baxu lléctricu), Álvaro Cueto (gaita y whistle) y Edu Llosa (percusiones) –formación a la que ta acabante de sumase Toya Solís (violín)–amuesen influencies de bandes como Pink Floy, Radiohead o Mogwai.

“Nestes bandes ye común atopar elementos musicales y llingüisticos de les cultures propies, usaos cola nidia intención de valorar la cultura popular, como facemos nosotros al incorporar la gaita como un instrumentu principal y la nuesa llingua como forma de comunicar colos nuesos cancios”, espliquen dende Melandru, grupu que siempre ta “a la gueta d’un paisaxe sonoru propiu, onde xugamos colos timbres de la gaita y los efeutos y distorsiones lléctriques”. Una propuesta diferente dientro de la música n’asturianu que pretende ser tamién una canal d’espresión al rodiu de la realidá social, política y cultural de nuesu tiempu.

“Pue dicise que Melandru ye una amalgama d’elementos que mecen la crítica al sistema nel que vivimos, tantu a nivel llocal como global, dando también llugar a les emociones mas personales y psicolóxiques, tou ello mezclao colos soníos que nos presten, que van dende la electrónica a lo tradicional”, espliquen los sos integrantes. El primer cenciellu que presenta la banda como adelantu ye ‘Dios tecnolóxicu’, nel que se recen “los mandamientos de la nueva relixón tecnolóxicana de la que tamos trescalaos nel sieglu XXI, na que paez que tolos nuesos problemes pasen por resolvese al traviés de les pantalles de los nuesos teléfonos móviles”.

Actuaciones n'Uviéu y nel Teatru Riera

‘Melandru’ sal mañana a la venta y va ser presentáu en direuto’l 8 de xunu na sala uvieína La Salvaje, cita na que los maliayos van tar acompañaos por Un Bosque Noruegu, grupu que fai música electrónica. Al día siguiente, van interpretar los sos temes énte’l so públicu nel Teatru Riera de Villaviciosa.