La Banda de Gaites Güestia premia a ‘Ambás’ y Carmen Prieto

Esti sábadu, a les 19.30 hores nel Teatru Vital Aza, va tener llugar la entrega de los premios qu’otorga la Banda de Gaites Güestia. Nesta ocasión los galardonaos son Xosé Antón Fernández ‘Ambás’ y Carmen Prieto.
 
Los Premios Güestia tienen como oxetivu reconocer “l’apoyu y difusión a la música y tradiciones asturianes de persones y instituciones”. Nel casu de ‘Ambás’, la banda de gaites de La Pola Ḷḷena otorga-y el so premiu “pola so vinculación al conceyu, al traviés del cancioneru cedíu del so Archivu de Tradición Oral, con canciones que recoyó pela xeografía ḷḷeniza”. El cantante de Tuenda protagonizó los dos discos encargaos pol Serviciu de Normalización Llingüística de Ḷḷena con temes tradicionales del conceyu.

La otra galardonada ye la ḷḷeniza Carmen Prieto, persona que tamién fixo un llabor importante na recopilación y difusión de la música tradicional de Ḷḷena. Prieto realizó una tesis doctoral –Cum laude– baxo’l títulu 'Música de Tradición Oral en el Concejo de Lena' que recibió dellos premios y qu’espublizó el Muséu del Pueblu d’Asturies y el Conceyu de Ḷḷena. D’esta forma, Prieto y Ambás tomen el relevu nos Premios Güestia de Gabino Antuña, componente del grupo Nuberu, y del Centro Asturiano Covadonga, de Gasteiz.
 
L’actu d’entrega de los galardones va celebrase nel Teatru Vital Aza a les 19.30 hores y nél van participar l’alcalde de Ḷḷena, Ramón Argüelles, y el conceyal de Cultura y Política Llingüística, David Suárez.