La banda ¿Aú? presenta la versión folk del ‘Villancicu’l Nataliegu’ na IV Folixa de Navidá d’Avilés

La gran fiesta navidiega infantil d’Avilés, la IV Folixa de Navidá, adelanta esta celebración qu’enllena d’ilusión a les neñes y neños de la zona. Nesta edición van poder disfrutar, ente otres munches actividaes, del ‘Villancicu’l Nataliegu’ qu’estrena la banda ¿Aú?.

A la espera de la llegada de L’Anguleru, prevista como tolos años pa Nuechebona, l’Auditoriu de la Casa Cultura d’Avilés va acoyer mañana dende les 19 hores actuaciones musicales, cuentacuentos y una ufrienda del nataliegu. Inclusive, ta preparada una conexón en direuto col personaxe navidiegu que lleva regalos a les neñes y neños asturianos, yá de viaxe pel Atlánticu hacia Asturies.

La xornada va comenzar cola interpretación de la versión folk ‘Villancicu’l Nataliegu’ por parte de ¿Aú? a partir de la orixinal de la compositora avilesina Reyes Duarte con lletra de Víctor Raúl Pintado ‘Vitu’. L’oxetivu principal de la banda “ye contribuyir con una melodía y una lletra atractiva pa los neños y neñes a recuperar una de las tradiciones navidiegues asturianes más antigües, el Nataliegu, el tueru de Navidá asturianu que se quema’l 24 d’avientu pa celebrar el solsticiu d’iviernu y dar proteición y felicidá, mientres tol añu, a les cases asturianes”, apunta’l músicu Ruma Barbero.

El cantar grabóse esta mesma seronda con un videu que ta disponible al final d’esta noticia. Pa la interpretación de mañana los miembros de ¿Aú? van contar cola collaboración del Corín del Centru Rural Agrupáu Castrillón-Illas.

Nataliegu decoráu

Un cuentacuentos d’Olga Cuervo sobre ‘Samalandrán. Islla de lleendes’ va dar continuidá a la folixa, na que van participar los ruleros Lolina y Xesús xunto con otros llendadores de ríu, los ayudantes de L’Anguleru. Depués de saludar a los presentes van llamar a esti personaxe tan esperáu pa que dedique unes pallabres al auditoriu.

Cola despidida de L’Anguleru daráse paso a la tradicional ‘Ufrienda´l Nataliegu’, con protagonismu esti añu pa los escolinos del Colexu Públicu Sabugo, que van recitar la rima de conxuru y ufir los bollinos tradicionales. El Nataliegu d’esti añu ye un espectacular caborniu de carbayu al que l’artesanu Juan Carlos Fernández talló un rostru.

Dende la zona trasera del tueru va colocase una vela nel so interior. Ésta simboliza’l nacimientu de la lluz; la celebración del solsticiu d’iviernu, cuando los díes comiencen a crecer.

Nel tramu final de la Folixa de Navidá va entregase-y a David Muñiz Albarracín el títulu de Maestru Llendador 2018, col que s’homenaxa a les xentes del mar y a la cultura pesquera avilesina y asturiana. Un conciertu del Corín del CRA de Castrillón-Illas, del de La Carriona Miranda y de la EM Mieres va completar una cita que se va zarrar cola entrega d’un paquete de castañes de chicolate y una carta pa L’Anguleru a toles neñes y neños.