La B. G. La Madreña participa nos actos de la Hispanidá de Nueva York

Celtiberian Heritage Society invita a esta formación a desfilar na Quinta Avenida, a dar una master class y a tocar en varies actuaciones.

Les bandes de gaites asturianes yá nun son desconocíes en Nueva York. En marzu siempre viaxa dalguna formación a la ciudá estaunidense pa representar a Asturies nel bayurosu desfile de San Patriciu y, nestes feches, ye’l tradicional desfile de la Hispanidá el qu’acueye los soníos de la nuestra tierra pela Quinta Avenida. Esti añu la Banda Gaites La Madreña de Llanera foi la invitada d’honor pola organización Celtiberian Heritage Society pa desendolcar esta representación.

Trentaidós componentes de La Madreña llegaron el sábadu 7 a Nueva York pa vivir unes intenses xornaes musicales que s’allargarán hasta esti vienres 13 d’ochobre. El domingu foi por dos vegaes: participaron nel desfile de la Hispanidá y darréu actuaron nel banquete d’esta festividá del Centru Español de Queens con una sorpresa añadida: tocaron xunto a Slum Suit, el grupu neoyorquín de jazz y música asturiana fundáu pol gaiteru uvieín emigráu Carlos Casado.

Tres la bona acoyida de les pieces interpretaes y los bailles fechos pola Banda Gaites La Madreña nel desfile de la Quinta Avenida nel Centru Español, ayer martes los sos componentes desplazáronse hasta’l Centru Asturianu d’esta ciudá pa dar una master class de baille y pandereta na que nun faltó la preba de gastronomía asturiana y dellos llitros de sidra. Tres d’esto, los de Llanera viaxarán hasta New Jersey el xueves 12 p’actuar nel so Centru Español, mientres qu’el vienres 23 lo faedrán nuna escuela bilingüe de Long Island.

Celtiberian Heritage Society

La visita de La Madreña al país americanu nun podría ser posible ensin el llabor de Celtiberian Heritage Society (Sociedá Herencia Celtibérica), organización creada esti añu por Bernardo Riveiro –gallegu emigráu a Nueva York fai más de 70 años, fundador y ex presidente del Centru Español de Queens-, col oxetivu d’ayudar a importar la música asturiana dientro de les llendes d’Estaos Xuníos. Tres desendolcar delles actividades per esti añu y producir el discu de los yá mentaos Slum Suit, estos actos de la Hispanidá son una nueva amuesa de que los soníos del nuestru país seguirán teniendo acoyida y sofitu al otru llau del Atlánticu.