La ‘Semana Negra’ da hasta’l vienres al Conceyu de Xixón pa que se pronuncie sobre’l festival

A poco más de trés meses pal aniciu de la ‘Semana Negra’, el certame sigue ensin ubicación definitiva. La organización del festival da al Conceyu de Xixón hasta’l vienres pa que se pronuncie sobre’l so futuru.
 
José Luis Paraja, voceru de la organización, foi quien avanzó la posición del equipu de Paco Ignacio Taibo II y recordó que’l gobiernu llocal, de Foro Asturias Ciudadano (FAC), sigue apostando pola celebración de la vixesimoquinta edición de la ‘Semana Negra’ nel Recintu Ferial Luis Adaro (FIDMA). Sobre los terrenos de Naval Xixón, propuestos pola organización, el Conceyu señala que “son propiedad de Pymar" y "nun se pueden visitar”. "Dimos-yos un tope de 48 hores pa ver el terrén, qu’haya un compromisu de que se pue utilizar y qu’espliciten los apoyos económicos y organizativos. Nel casu contrario, se seguirá trabayando pa la ‘Semana Negra’ del 2013", señaló Paraja, que refuga la feria de muestres pal eventu.
 
D’igual forma, el representante sorrayó que, a fecha de 21 de marzu, "nun hai plazu material" pa organizar la ‘Semana Negra’ como vien siendo habitual dende hai más de dos décades y criticó’l retrasu con que s’aborda l’asuntu, pese a solicitar una reunión primera n’agostu del 2011 que se celebró, al final, en xineru. "Cuando se pedía n’agostu una reunión yera porque sabemos que los problemes surden de continuu y cuando nun hai tiempu, anque los problemes sían solucionables, nun se pue", sentenció.