L' institutu de la muyer fai campaña pola muyer empresaria

La Conseyera de la Presidencia María José Ramos presentó oficialmente esta mañana la campaña "Esto nun ye un cuentu"
que s'enxerta nel proyectu "La igualdá crea emplegu" que pertenez a la iniciativa comunitaria
EQUAL.

El proyectu, coordináu pol Institutu Asturianu de la Muyer y la Dirección
Xeneral de Formación, quier afalar que les muyeres creen empreses y que s'afiten les que yá esisten y tamién consta d'una esperiencia
pilotu de formación y entrada nel mercáu llaboral de muyeres dientro'l sector
de la construcción. El proyectu desarrollarase dende'l 2002 hasta el
2004.La campaña, entitulada "Esto nun ye un cuentu" quier tresmitir el mensaxe de que cualquier muyer puede
entamar el so camín nel mundu empresarial, y pa ello valse de personaxes sacaos de cuentos tradicionales. Les figures de Capiellina encarnada,
Blancañeves, la Cenicienta y otros cuentos tradicionales que-y dexen a la muyer un papel secundariu conviértense nesta campaña en seres con voluntá propio que ruempen col estereotipu de la
muyer nel cuentu tradicional. La campaña inclúi propaganda en tolos medios de comunicación convencionales y tamién unvios de corréu
personalizaos que llamen a dir a visitar los centros oficiales del Principáu onde se da información, formación, asesoramientu y
recursos a les muyeres interesaes en poner una empresa. Amás de la propaganda en medios de comunicación convencionales y n'encontos en marquesines, autocares etc, la campaña fai un apueste pola rede internet, con banners nes principales webs asturianes y tamién con una web propia de la campaña, en cuantes que la muyer asturiana tien una importante presencia como usuaria d'internet. Dende'l Gobiernu del Principáu d'Asturies sorrayen que la campaña enfótase n'apurrí-y a la muyer asturiana los preseos básicos y el sofitu pa sacar alantre les sos iniciatives empresariales, lo mesmo nel mediu urbanu que nel
rural, dándose asistencia nos centros d'Empreses d'Avilés, Xixón, Llanera, Tinéu,
Llangréu, Mieres y Samartín del Rei Aurelio, y tamién nes Axencies de
Desarrollu Local d'A Veiga y Llanes.