L’occidente del país acueye conciertos de los grupos Bacotexo y Tuenda

El rock y la música tradicional asturiana van tener protagonismu esti sábadu nel occidente del país. Bocatoxeo va actuar n’A Caridá, mentes que Tuenda va participar na Fiesta de Navidá de la Escola de Música y Danza Tradicional de Cuaña.

L’Auditorio das Quintas d’A Caridá va ser sede de l’actuación de la banda de rock en gallego-asturiano a partir de les 20 hores, con entrada de baldre. Marcos Nogueiro, Ricardo Saavedra y Dani García van presentar n’El Franco los cantares del so segundu discu, ‘Homes invisibles’, nun conciertu nel que tamién van sonar temes del so álbum debú, ‘A máquina del tempo’. Amás, nel mesmu actu, les persones que s’averen al auditoriu franquín van poder ver el videu del cantar ‘Campos de meiz’, rodáu esti añu nel propiu conceyu.  

Pela so parte, el festival de Cuaña va principiar a les 19 hores na Casa Cultura d’Ortigueira. Nél destaca la presencia del tríu de folk acústicu compuestu por Xosé Antón Fernández ‘Ambás”, Elías García y Pepín de Muñalén, qu’actuará énte un públicu formáu na so mayor parte por xente mozo. Amás de Tuenda, tamién ta prevista l’actuación de los alumnos de la escuela cuañesa nes especialidaes de gaita asturiana, acordión diatónicu, percusión tradicional asturiana, pianu, guitarra y gaita gallega, acompañaos de los sos profesores. La entrada pa presenciar el festival, enmarcada dientro del ciclu de conciertos ‘Conceyo de Cantares’ del Parque Histórico del Navia, que s’entama col sofitu económicu de la Conseyeiría d’Educación, Cultura y Deporte, ye de baldre. A Escola de Música y Danza Tradicional de Cuaña va rifar una cesta de navidá a lo llargo del eventu.