L’institutu xixonés Rosario Acuña convoca’l so decimoquintu premiu d’investigación y divulgación

Les persones interesaes en participar nel XV Premiu d’Investigación y Divulgación IES Rosario Acuña yá pueden unviar los sos trabayos. L’institutu xixonés divide esti gallardón pa estudiantes y investigadores en trés estayes.

La primera ta llendada a alumnos d’ESO, Bachilleratu y Ciclos Formativos, qu’han de tar avalaos por un profesor del centru onde desarrollen los sos estudios. Los trabayos deben ser orixinales, con una estensión máxima de 50 páxinas, y referise a aspeutos del pasáu, presente o futuru d’Asturies de cualquier temática, como pue ser la naturaleza, el mar, el campu, la industria, la lliteratura, el comerciu, el turismu, el folclor, la historia, la xeografía, l’arte, la economía, la sociedá o la llingua asturiana. El ganador d’esta estaya recibirá 400 euros, mentes que’l centru escolar va llevase 300.

El públicu en xeneral pue participar nes otres dos categoríes de los premios Rosario Acuña: una pa trabayos centraos en Xixón y otra, n’Asturies, con una recompensa de 2.000 euros caúna. Al igual qu’asocede colos estudiantes, éstos son de temática llibre, anque nesti casu la estensión de los trabayos ha de ser d’ente 50 y 150 páxines.

El plazu pa entregar los testos, que pueden dir acompañaos de material gráficu, fina’l 15 de marzu. Éstos han de tar incluyíos nun sobre zarráu –con plica–, nel que figurará un nomatu y la categoría na que se presente, que s’entregará o unviará per corréu a la secretaría del IES Rosario Acuña, na cai Puertu de Vegarada e/n, 33207 Xixón. El 2 de mayu fadráse públicu’l fallu del xuráu que va tar conformáu por Carlos Rubiera, conceyal d’Educación, Cultura, Deportes y Fiestes; Xosé Nel Riesgo, direutor de la Fundación Municipal de Cultura, Educación y Universidá Popular; Sara Álvarez Morán, direutora xeneral de Formación Profesional, Desarrollu Curricular y Innovación Educativa; José Antonio García Fernández, xefe de serviciu d’Ordenación y Evaluación Educativa; Carlos Dago, inspeutor d’Educación; José Antonio Rodríguez Canal, ex direutor axuntu del diariu El Comercio; José  María Ceinos, periodista de La Nueva España de Gijón; Eduardo García García, periodista; José Luis Manso Santamaría, presidente del AMPA del IES Rosario de Acuña; Paulino J. Matesanz, direutor del IES Rosario de Acuña; Francisco Alonso Llano, ex direutor del IES Rosario de Acuña; Benigno Delmiro Coto, caderalgu de Llingua y Lliteratura; y Macrino Fernández Riera y Francisco Rodríguez Menéndez, profesores del IES Rosario de Acuña.