L’historiador xixonés Pablo Rodríguez Alonso publica la obra 'De totalitarios a «demócrates»'

Pablo Rodríguez Alonso ta acabante de publicar 'De totalitarios a «demócrates». Franquismu, fascismu y nazismu na II Guerra Mundial al traviés del diariu xixonés Voluntad'. Esta obra algamó’l XII Premiu d’investigación histórica Rosario de Acuña.

Nesta investigación l’autor fai un repasu al discursu ellaboráu dende Voluntad, mediu d’espresión oficial del falanxismu xixonés, un periódicu que va ser la voz de los vencedores de la Guerra Civil y nel que los mensaxes de venganza contra los vencíos, d’emponderamientu del totalitarismu nazi y fascista y de denuncia de la democracia y les llibertaes van ser una constante. Sicasí, como conseña’l llibru, esi discursu va dir cambiando a medida que l’escenariu internacional, marcáu pola Segunda Guerra Mundial, vaya averándose a la derrota final d’Alemaña, Italia y Xapón. El llibru ta publicáu por Zahorí Ediciones.

 L’autor, Pablo Rodríguez Alonso (Xixón, 1979) ye llicenciáu n’Historia pola Universidá d’Uviéu. Tien publicao los artículos 'El nacionalismo bretón desde 1945 a la actualidad' na obra recopilatoria de les I Jornadas de Historia Contemporánea y 'La nacionalización llingüística nos Estaos-nación: l’exemplu español' nel llibru ‘Teoría e historia de los nacionalismos contemporáneos’, dambos editaos pola Facultá d’Historia de la universidá asturiana. Asimesmo tien editao’l poemariu ‘La lluz del Nordés’ (Trabe, 2006), ganador del XV Premiu ‘Teodoro Cuesta’ de Poesía.