L’Estáu ha de pagar a Asturies 213 millones d’euros de los convenios del 2011 de los fondos mineros

|
L’Audiencia Nacional dio la razón al Gobiernu d’Asturies y desestimó’l recursu del Executivu estatal sobre'l pagu de 213 millones d’euros adeudaos de los convenios del 2011 de los fondos mineros. Tovía tán en pleitu los del 2012 y 2013.
 
El Gobiernu de Foro foi’l que llevó a los tribunales n’abril del 2012 la decisión del Conseyu de Ministros del 30 d’avientu del 2011 d’eliminar los fondos mineros dedicaos a infraestructures por “una imposibilidá económica sobrevenida”. Tres les eleiciones anticipaes, el PSOE decidió siguir alantre col pleitu, algamando la razón nesti asuntu, polo que Madrid recurrió énte l’Audiencia Nacional, que decide agora qu’Asturies ha de recibir los 213.056.914 euros adeudaos. Unes perres qu’adelantó’l Gobiernu pa executar les obres previstes de financiar con fondos mineros.
 
“Ye una noticia qu’avala l’argumentación presentada tanto polos servicios xurídicos del Principáu como pol despachu d’abogaos –de Luciano Parejo, profesor de la Universidad Carlos III de Madrid– que se contrató con esi envís, pero que políticamente tamién avala la tesis del Gobiernu d’Asturies y pon de manifiestu l’incumplimiento del Gobiernu de Rajoy colas cuences y colos asturianos”, señaló Guillermo Martínez, voceru del Executivu asturianu, na anuncia oficial de la sentencia, actu nel que tuvo acompañáu por Graciano Torre, conseyeru d’Economía y Emplegu. Dambos recordaron que tovía siguen nos tribunales los recursos sobre los convenios del 2012, con cantidaes superiores a los 56 millones, y los del 2013, que podría tar en 68 millones, anque’l Gobiernu entovía nun dio la cantidá esacta.
 
Na semeya, l’enllaz de Lieres, pal que’l Gobiernu tuvo qu’adelantar les perres de los fondos mineros qu’adeuda Madrid.
 
 
 
Contador Estadistiques