L’ausencia del idioma nel pabellón d’Asturies na FIDMA provoca’l refugu d’Iniciativa pol Asturianu

Dedicáu a los cais asturianos, el stand del Gobiernu nun respetó la toponimia oficializada pola propia alministración. Tampoco nun s’emplegaron nomes asturianos como 'rula', utilizando'l castellanu 'lonja'.

El pabellón asturianu, con una amuesa espositiva más probe que n’años anteriores, dexó pa prau l’usu del asturianu, col añadíu de que nun respetó la toponimia oficial. Asina, nos paneles emplegáronse formes yá derogaes o la versión castellana del nome billingüe oficializáu, destacando esta situación sobre manera nun mapa grande d’Asturies colos principales cais del país que presidía’l stand nel so pisu superior.

“Iniciativa pol Asturianu quier espresar el so malestar pola falta de presencia de la llingua asturiana nel pabellón del Gobiernu d’Asturies na presente edición de la Feria Internacional de Muestres d’Asturies (FIDMA)”, considerando “cafiante que'l pabellón institucional escaeza dafechu la toponimia aprobada pol propiu Gobiernu, magar que dalgunos decretos d’oficialización cumplieron yá diez años. Asina apaecen les versiones yá derogaes de topónimos como Llastres, Xixón, Ḷḷuarca, Lluanco...”, apunten.

D’igual forma, llamenten “la sustitución de dellos conceptos como ‘rula’ ya ‘ñocla’ polos sos equivalentes en castellán, magar que les pallabres n'asturianu son les qu'usa tola población y poles que tendría de puxar l'alministración”.

La llingua, ensin presencia en tol recintu ferial

La organización que trabaya pola normalización del idioma recuerda que la situación del pabellón d’Asturies repítese en tol Recintu Ferial Luis Adaro mientres la FIDMA, que zarró ayeri les sos puertes tres dieciséis díes d'actividá intensa y 706.649 visitantes. “La llingua tampoco nun tien representación nenguna per parte de la organización de la propia feria, nin nel pabellón del Conceyu de Xixón, onde l’usu de la toponimia oficial ye inesistente”, añade.

Por esti motivu, cree necesario “la puesta en marcha d'un Plan de Normalización dientro del recintu ferial asturianu col envís de da-y una mayor presencia a la llingua asturiana en cartelería, pabellones, usos publicitarios, etc.”.