L’Audiencia anula la Orde Ministerial que regula'l canon dixital, pero los usuarios van siguir pagando

La Orde Ministerial de la Presidencia que regula’l canon dixital dende’l 2008 foi anulada esti xueves pola Audiencia Nacional. Ello nun quier dicir que desapaeza esta tasa, puesto que la ministra señaló que’entren en validez les tarifes del 2006.
 
La sala de lo Contencioso Alministrativo de l’Audiencia Nacional entiende qu’esta Orde Ministerial se trata d'un reglamentu dictáu n'execución de la Llei de Propiedá Inteleutual y que, polo tanto, pa la so aprobación facíen falta determinaos trámites relativos a les memories xustificatives y económiques, amás del dictame del Conseyu d'Estáu, que nun se fixeron. Considérase, amás, que la mentada orde, ta afectada de “viciu radical”, lo que determina la so nulidá de “plenu derechu”. Esta decisión de l’Audiencia nun vien acompañada de la devolución de lo recaudao col canon dixital, como reclamaben l’Asociación d’Internautes, coleutivu que recurrió la Orde Ministerial.
 
L’anulación nun va facer desapaecer el canon dixital, puesto qu’agora entren en validez les tarifes del añu 2006, según señaló la ministra de Cultura, Ángeles González-Sinde. El canón d’hai cinco años nun afeutaben a los teléfonos móviles, pero el pagu por DVD yera mayor qu’agora: 0,60 euros cola reglamentación del 2008 y 0,46 euros, cola del 2006. González-Sinde tamién afirmó que la sentencia “nun cambia los planes” del so ministeriu al debese a un defeutu de forma.