L’ATNLL, esmolecida pol retrasu nel resolvimientu de les subvenciones a asociaciones, empreses y particulares

L’Asociación de Trabayadores de la Normalización Llingüística (ATNLL) amuesa la so preocupación pola “tranquilidá” del Gobiernu pa resolver les subvenciones a asociaciones, empreses y particulares. Teme que se puedan perder.
 
“Vemos con muncho esmolecimientu’l fechu de que teamos a piques de qu’acabe’l períodu llegal pa resolver los espedientes presentaos y sigamos a la espera de la resolución de la Conseyería de Cultura no tocante a les subvenciones pa la normalización social del asturianu y del gallego-asturianu pa empreses, asociaciones y particulares que se convocaron por resolución d’esa mesma conseyería’l 14 d’abril del 2011 y se publicaron nel BOPA del 29 d’abril del 2011. Ye chocante que tovía nun se sepia nada al respeutu, teniendo como tienen les persones o entidaes beneficiaries d’atropar tola documentación requerida, asina como les muestres escrites o/y fotográfiques que xustifiquen el destín de les perres subvencionaes, si ye que les hubiere, primero del 30 de payares, por nun mencionar a les persones y organismos que yá invirtieren eses perres nos proyeutos pa los que solicitaren apoyu económicu”, señalen los trabayadores de la normalización llingüística, qu’aseguren temer perder les subvenciones de nun resolvese éstes nel plazu llegal “como yá ta pasando n’otres comunidaes con llingua propia”.
 
L’importante oxetivu d’estes ayudes, “que nun ye otru que prestixar y normalizar los idiomes d’Asturies”, ye motivu suficiente pa l’ATNLLA pa que’l Gobiernu entrante de FAC dea’l pasu y resuelva les subvenciones. “Prestaríanos enforma que la Conseyería de Cultura materializara l’apoyu a la normalización del asturianu y del gallego-asturianu anunciada na campaña del so partíu y nes sos intervenciones públiques resolviendo aína les subvenciones destinaes a la normalización ente empreses, asociaciones y particulares, tan necesaria p’acabar cola diglosia que se vive n’Asturies”, apunta’l coleutivu.