L’Ateneu N’Alfoz entama un cursu d’introducción a la toponimia asturiana

El cursu va tener llugar los díes 9, 16 y 23 de payares, nel llocal de L’Ensame n’Avilés. El oxetivu será ufiertar un marcu teóricu y prácticu qu’aide a la formación de los interesaos en recuperar la toponimia tradicional d’Asturies.

L’Atenéu N’Alfoz organiza esti Cursu d’Introducción a la toponimia asturiana, que va ser impartíu por dos espertos na materia: Fernando Álvarez-Balbuena, especialista en Filoloxía Asturiana pola Universidá d'Uviéu y miembru de la Xunta Asesora de Toponimia del Principáu; y Llinu Álvarez Santidrián, maestru y tamién espertu en Filoloxía Asturiana.

El programa va tomar conceutos básicos, configuración hestórica y procesos de deturpación y recuperación. Va dividise en tres xornaes teórico-práutiques, los sábados 9, 16 y 23 de payares de 16.30 a 18.30 hores, cola posibilidá de facer una salida de trabayu de campu. El cursu va ser de baldre tantu pa socios como pa non socios, anque les places van tar llindaes previa inscripción.