L’Ateneu N’Alfoz axuntó a más de 30 persones nuna ruta pola recuperación de L’Escañoriu

El caberu sábadu, 24 d’agostu, más de 30 persones participaron nuna ruta andariega convocada pol Atenéu N’Alfoz. L’oxetivu yera reivindicar la protección y recuperación del espaciu de L’Escañoriu, en Corvera.

El coleutivu, conformáu por persones d’Avilés, Castrillón, Corvera y Illas y que trabaya na defensa de la llingua, el patrimoniu y la cultura d’Asturies, pretende visibilizar el valir ambiental del espaciu protexíu de L’Escañoriu y solicitar una partida presupuestaria a l'Alministración pública pa realizar xunes cates nel castru, datar la so antigüedá y estudiar la so morfoloxía, como primer pasu pa la so recuperación. Midíes que yá s’atopaben nel Plan de Protección Especial de L’Escañoriu aprobáu nel añu 2002, qu’al fin quedó en papel moyáu. Les convocantes consideren que “estos trabayos podríen dar llugar a un importante recursu, non solo cultural, sinón tamién económicu pa los vecinos de la redolada y de la contorna, en xeneral. “

La ruta principió en Les Vegues a les 10 de la mañana y trescurrió a lo llargo d’unos 8 quilómetros de percorríu pela parroquia de Molleda hasta llegar a El Castiellu, onde visitáronse les ruines del Castru y a la vuelta los asistentes percorrieron la Foz de L’Escañoriu. Ente los asistentes atopábense representantes d’otres asociaciones (La Foz del Pielgu, Coordinadora Ecoloxista), asina como dellos representantes políticos (IX, Foro, Más Corvera).