L’Atenéu N’Alfoz entama una ruta andariega y reivindicativa a L’Escañoriu y al Picu Castiello

El sábadu 24 d’agostu va tener llugar una ruta andieriega y reivindicativa a L’Escañoriu y al castru del Picu Castiello. L’Atenéu N’Alfoz entama esta actividá abierta a tola xente interasao, con salida a les 10 hores de Les Vegues.

“La ruta tien un enclín reivindicativu, col oxetivu de visibilizar el valir ambiental del espaciu protexíu de L’Escañoriu y de solicitar una partida presupuestaria a l'Alministración pública pa realizar unes cates nel castru, datar la so antigüedá y estudiar la so morfoloxía, como primer pasu pa la so recuperación”, señalen dende esti coleutivu conformáu por persones d’Avilés, Castrillón, Corvera y Illas que trabaya na defensa de la llingua, el patrimoniu y la cultura d’Asturies. Al respeutu, l’Atenéu N’Alfoz recuerda que nel añu 2002 foi aprobáu un Plan de Proteición Especial de L'Escañoriu, garrando asina la denominación de Monumentu Natural y pasando a forma parte d’un plan d’actuaciones nes que se incluyíen la escavación del castru, la restauración d’una ponte medieval,  la repoblación con árboles autóctonos y la programación d'un serviciu de llimpieza, ente otros asuntos. “Too esto, a la fin quedó en nada, atopándose la zona nun estáu de semiabandonu”, afirmen dende l’asociación, que demanda “la recuperación d'esti plan”.

Como forma de protesta y col oxetivu d’informar sobre la situación del espaciu protexíu de L’Escañoriu, l’Atenéu N’Alfoz entama pal sábadu próximu una ruta abierta a tol mundu que va llevar a los participantes hasta’l llugar. Ésta, d’ocho quilómetros de llargor, va salir a les 10 hores de la retonda d’entrada a Les Vegues y Molleda, pa percorrer esta parroquia per caleyes y carretes de pocu pasu disfrutando de delles edificaciones d’interés. La primer visita va ser al Picu Castiello, pa depués baxa a L’Escañoriu. Pa finar, va celebrase una xinta nuna quintana que cuenta con un molín y una panera remocicaos. Dende la organización avisen de que la ruta nun tien dificultá nenguna, a esceición del tramu final na garganta de L’Escañoriu, onde caún va poder escoyer hasta ú quier o pue llegar.