L’asturianu va contar con un espaciu na Feria de Muestres de Samartín

Esti vienres abre les sos puertes nel recintu d’El Florán la XXIII Feria de Muestres y Esposiciones de Samartín del Rei Aurelio (FEMEX). Per primer añu, la llingua asturiana va contar con un espaciu propiu nel certame.

La Oficina de Normalización Llingüística de Samartín del Rei Aurelio va ufrir un puntu d’información pa que toles persones que s’averen al recintu ferial asitiáu ente Blimea y Sotrondio, yá sían empresarios, miembros d’asociaciones, personal docente o simplemente interesaos, puedan conocer de primer mano tola actividá que desendolca esti organismu y facer usu de los sos servicios. D’igual forma, los responsables del SNL van esponer tol trabayu desendolcáu nos sos ocho años d’actividá y van ufiertar información sobre les actividaes que van poner en marcha a lo llargo de los meses próximos, ente les que destaquen delles esposiciones, una campaña de promoción toponímica o la organización d’unes xornaes de lliteratura infantil y xuvenil entamaes en collaboración cola asociación cultural Bocina Nalón.

La FEMEX, que s’inaugura esta tarde, a les 17.30 hores, con un actu nel que va tar presente l’alcalde, Enrique Fernández, y representantes de las instituciones que formen parte del consorciu organizador, esto ye, Conseyería d’Economía, Cámara de Comercio de Oviedo y CaxAstur, va permanecer abierta hasta’l llunes. Nesta edición participen un total de 52 espositores de sectores como l’alimentación, los servicios, la moda, el calzáu, los complementos, los muebles, la decoración o l’automoción, ente otros, a los qu’hai que sumar stands institucionales del Conceyu de Samartín del Rei Aurelio, l’asociación de comerciantes ECOSAM, Coxersa, Radio Samartín o l’Asociación de Discapacitaos Rei Aurelio. Mentes los cuatro díes de la FEMEX, los visitantes tamién van poder disfrutar d’una programación cultural amplia qu’inclúi actuaciones musicales y de baille, una pasarela de moda, un espectáculu d’ilusionismu, talleres de tiru con arcu, corderu a la estaca y el tradicional certame municipal de ganáu, ente otres actividaes.