L’asturianu algama representación nel claustru de la Universidá
|
5 Payares, 2010 por Xicu Ariza
- Inicie sesión o rexístrese pa espublizar comentarios
El xueves 4 de payares la Universidá d’Uviéu vivió les elecciones al Claustru, máximu órganu de representación de la Universidá. Con un 88% d’abstención, hubo bonos resultaos pa candidatures comprometíes cola llingua asturiana.
Les urnes electorales tuvieron abiertes en tolos centros de la Universidá d’Uviéu por mor de les elecciones al Claustru, l’órganu universitariu de decisión más importante. Nél ta presente’l rector, Vicente Gotor, y un total de trescientos miembros escoyíos por tola comunidá universitariu.
22.050 yera’l númberu total d’estudiantes que podíen votar pa escoyer a 72 representantes d’estudiantes nel claustru; sicasí, namás que fueron a les urnes 2.426 alumnos, lo que da como resultáu un 88% d’abstención ente los estudiantes.
L’escrutiniu da la victoria electoral a la Unión De Estudiantes (UDE), con 37 representantes. “Centrase n’aquello qu’interesa al cuerpu estudiantil, como l’aplicación efectiva de Boloña”, ye ún de los oxetivos d’UDE, según indicaron miembros d’esti colectivu en nota de prensa.
La llingua asturiana nes llistes
Ente’l total de candidatures, destaquen pol compromisu de da-y puxu a la llingua y cultura asturiana na universidá la de la Xunta d’Estudiantes Pol Asturianu (XEPA) y les impulsaes pol Movimientu Estudiantil Críticu y Asambleariu (MECA).
La candidatura de XEPA, encabezada por Llorián García y que se presentó namás qu’a la Facultá de Filoloxía y Lletres, nun foi a algamar representación. Sicasí, les impulsaes por MECA ficiéronse con un total de 16 claustrales, lo que convierte a esi movimientu estudiantil na segunda fuerza de la Universidá d’Uviéu.
“Ente otres reivindicaciones taba’l da-y un pesu importante al asturianu na Universidá, fomentar la cultura asturiana y l’usu normal de la llingua dientro de les instituciones de la Universidá”, señala a ASTURIES.COM Sergio Naves, ún de los miembros de MECA escoyíu como representante na Facultá de Derechu.
Contra los númberos claustros
Otres de les reivindicaciones de les estremaes candidatures impulsaes por MECA ye la “oposición frontal” al Plan de Boloña y el rechazu a los númberos claustros, daqué que quieren implantar en delles facultaes y que torga l’accesu llibre a dalgunos estudios universitarios.
“Agora mesmu, por falta de recursos económicos de l’alministración, ponen esa excusa pa dexar d’invertir perres en profesoráu y intentar torgar l’accesu a nuevos estudiantes a la universidá”, denuncia Naves sobre los númberos claustros.
Movilización estudiantil
D'otra miente, el miembru de MECA fai balance de los resultaos:“El PSOE al traviés de la so candidatura, la UDE, subió’l porcentaxe del númberu de claustrales, ente otres coses, por mor de la fraccionalidá qu’existe anguaño ente la xente afín al PP”.
Del movimientu del qu'él forma parte sorraya que “convirtióse na primera fuerza en movilización”, daqué que calificó de "positivo" pa esta fuerza asturiana que tien como oxetivu cimeru la movilización estudiantil.
Efrén d'Andrés
Comentarios
Non ta mal,ye un roblagu pa llantre en pos de nuesa LLINGUA , un mas de los munchos ,que mos facen falta algamar, mios parabienes a los votantes...
Esos 16 claustrales de los que se fala son simplemente peña asamblearia non vinculada con partidos políticos, puntu. Nun ye MECA!
Ye cierto que la xente de les asamblees antibolonia y na cuerda alternativa de los órganos de representación de va 2 años, nos reaxuntamos esti añu usando el nome de MECA!, pa promover que se presentara xente independiente nel claustru, en oposición al predominiu inmovilista y parasitariu del PSOE (UDE) y la derecha.
Pero MECA! nun son los 16 claustrales, somos un grupo de xente que ayudó a que esto fuera posible, y con una idea, un proyeutu de coordinación ente asamblees abiertes de toles facultaes, que eclipse col so movimietu la mísera actividá de los que dicin representar a los estudiantes y a fin de cuentes tan pa ganase ante los sos mayores un puestín pal día de mañana.
Y como proyeutu, ye algo que hai que plantegar de manera pousadísima a munchos compañeros, munchos de esos claustrales que salieron, que inda nun tan plenamente al tanto.
Por ello dicir que si l'Asturianu sacó nunseiqué o nunsecuantes más... en fin, seamos serios. Si realmente consiguimos dempués d'esti añu de trabayu crear un movimientu estudiantil en condiciones, y parte d'esti movimientu se encarga del tema llingua, y el resto lo respalda solidariamente, pues coyonudu. Pero tamos falando de planes y non de feitos... lo más probable ye que al final resulte no mesmo, pero anticipar conclusiones d'esta manera ta fuera de llugar, nenos.
Prudencia, si non nun llegamos a ná!
Non solo l’Asamblea d’Estudiantes (sofitada pol Meca) y la candidatura XEPA nel Campus del Milan puxaron pola Llingua Asturiana nestes eleiciones al Claustru universitariu, na nueva Facultá d’Economía y Empresa presentose una candidatura de centru e independiente baxo el nome de "Convergencia Democrática de Estudiantes (CDE)" que nel so programa eleutoral incluyo la defensa de la Identidá asturiana (cultura, hestoría, etc) y el fomentu y proteición del Asturianu dientru de la Universidá d’Uviéu dende el Claustru. Colocandose nesta macrofacultá como segunda fuercia estudiantil con dos claustrales por detras de los 6 algamaos por UDE(PSOE), igualando en claustrales y superando en votos a la candidatura HAYAK(PP) y superando tamién en claustrales a los candidatos individuales de l’Asamblea qu’algamo un claustral.
Un saludu y a siguir trabayando toos pola nuesa llingua!