L’Asociación Pepe Bocanegra torna a programar conciertos de música asturiana na Selmana Santa

L’Alcuentru de Músiques Feches n’Asturies torna a llevar en Selmana Santa al llocal de l’Asociación Pepe Bocanegra una escoyeta de bandes del país. Asturiana Mining Company, Bon Tastu, Xera, Stroza y Skama la Rede actúen nesta ocasión.

 

Tres la esperiencia de los conciertos de P’Amusquis, Tuenda y LAP (Lisardo, Ablanedo y Pepín de Muñalén) n’años anteriores, y l’esitu de los alcuentros del añu pasáu, nel que participaron Felpeyu y Dixebra, esti coleutivu músico-cultural asitiáu en Valles, nel conceyu de Piloña, entama trés díes d’actuaciones con grupos d’estilos diferentes. El primer d’ellos va tener llugar mañana, a les 23 hores, y va tar dedicáu a la música tradicional. Asina, van xubise al escenariu del cuidáu llocal de l’asociación l’Asturiana Mining Company y Bon Tastu, un tríu folk de nueva formación.

 

El vienres, a la mesma hora, va ser el turnu de Xera, quiciabes ún de los grupos más internacionales de la escena musical asturiana gracies a la so apuesta novedosa de folk electrónicu. Completen el cartelu d’estos Alcuentros de Músiques Feches n’Asturies la banda de Tante, ex guitarrista de Los Berrones, de nome Stroza, y Skama la Rede, qu’esti añu celebren diez años de vida, con un conciertu previstu pal sábadu a les 22.30 hores. El llocal de l’Asociación Músico-cultural Pepe Bocanegra va abrir una hora enantes de que principien les actuaciones. Recomiéndase a los asistentes acudir con antelación pol aforu reducíu del llugar.