L’asociación Ensame Sidreru gana’l I Premiu Timón de Cultura Asturiana

L’asociación dedicada a la cultura sidrera gana'l I Premiu Timón de Cultura Asturiana p’asociaciones, sociedaes y fundaciones. El xuráu destaca'l so trabayu na difusión de la sidra, sobre manera cola espublización mensual 'La Sidra'.

L’Ensame Sidreru ye la ganadora d’esta primera edición del Premiu Timón de Cultura Asturiana, gallardón convocáu pola Asociación Cultural L’Arribada y que ta dirixíu a asociaciones, sociedaes y fundaciones con sede n'Asturies, que tengan como fin la conservación y promoción de la identidá cultural del país y qu'empleguen la llingua asturiana nes sos actividaes. El so trabayu na difusión de la sidra y los elementos culturales que-y son propios valió-y la reconociencia del xuráu, destacando sobre manera a la revista billingüe La Sidra, que se vien espublizando de forma mensual dende l’añu 2003 y que recueye en más de cien páxines, y con tiraes de miles d’exemplares, noticies d’actualidá, reportaxes, recetes y too aquello que se venceya al mundu sidreru.

El xuráu tuvo formáu por Mayte González, David M Rivas, Carlos Espina y Aurora García Rivas, y presidíu por Humberto Gonzali. Los nominaos nesta primera edición foron la Sociedad Humanitarios de San Martín, la Fundación Belenos, l'Asociación Cultural San Tirso del Eo, la Tertulia Cultural El Garrapiellu, la Fundación Caveda y Nava, la Sociedad Popular y Cultural La Regalina y la Xunta pola Defensa de la Llingua Asturiana.

El gallardón va entregase mientres la celebración de la Vagamar 2013, el viniente sábadu 28 de setiembre, y consiste nuna obra del escultor y ceramista xixonés Jesús Castañón. Nel mesmu actu tamién van entregase´l VII Premiu Timón pa escritores n’asturiano y eonaviego, ganáu por Miguel Rojo, y el IV Premio Timón pa escritores asturianos en castellanu, ganáu por Gonzalo Suárez.