L’Asociación de Mas y Pas del CEIP de Tremañes denuncia torgues al enseñu del asturianu

La plantiya del Colexu d’Educación Infantil y Primaria de Tremañes va tener un solo maestru d’asturianu’l cursu próximu que va compartir con otres dos escueles. Ello va impidir que los alumnos d’Infantil tengan clases de Llingua Asturiana.
 
L’Asociación de Mas y Pas del colexu xixonés fixo pública esta situación al traviés del Sindicatu Unitariu y Autónomu de Trabayadores de la Enseñanza n’Asturies (SUATEA). Según aseguren, nel Tremañes impartióse la materia de Llingua Asturiana nel Segundu Ciclu d’Educación Infantil “polo menos dende’l cursu 2002-2003 hasta’l cursu 2007-2008, incluyíos. Nos cursos 2008-2009 y 2009-2010, el Colexu caltuvo esta asignatura solo en Primaria porque la Conseyería nun reconoció l’horariu suficiente pa que’l maestru la materia tamién la impartiese n’Infantil. El cursu 2009-2010, por fin, el colexu pudo recuperar la normalidá nesti aspeutu, tornando impartirse Llingua Asturiana en toles estayes educatives; pa ello dispuso d’una maestra que compartía’l so horariu de trabayu col CEIP de Xove”. Una situación que torna a camudar esti añu, yá que la plantiya anunciada pola Conseyería d’Educación y Ciencia contempla un profesor d’asturianu pal Tremañes y dos colexos más, el de Xove y l’Honesto Batalón, en Cimavilla.
 
“De facese realidá esti endurecimientu les condiciones, obligaría a qu’otra vuelta les families d’Educación Infantil de Tremañes nun puedan exercer el so derechu estatutariu a que los sos fíos cursen esta materia”, aseguren dende l’Asociación de Mas y Pas del CEIP de Tremañes. “La Conseyería sabe perbién que la escolarización de la Llingua Asturiana en tola ufierta educativa del Centru –Infantil y Primaria– figura nos sos documentos oficiales –PEC, PXA– y que tien el sofitu de tolos muérganos de gobiernu. Esta escolarización tuvo siempre’l sofitu decidíu de tola Comunidá educativa y, cimeramente, de les families, como amuesa’l fechu de que casi’l 100 por cientu del escolináu d’Educación Infantil curse davezu esta materia”, añaden. D’igual forma, señalen que “camentamos que los cambios previstos na plantiya pal cursu próximu asitíense ñidiamente fuera’l marcu llegal afitáu pa la escolarización de la nuesa llingua”.
 
Por último, dende’l coleutivu de mas y pas aseguren que’l CEIP Tremañes “cumplió cola so obligación d’ufrir a toles families d’Educación Infantil la opción de cursar estudios de Llingua Asturiana nesta estaya. Casi’l 100 por cientu de les families opten de manera voluntaria por esa ufierta formativa y vense agravaes pol fechu de qu’unos años los sos fíos pueden estudiar esta materia y otros años la Conseyería d’Educación torga esi drechu al nega-yos el profesoráu necesariu”. Por ello, reclamen a Educación que “proceda a garantizar el derechu que les nueses families tienen a que les sos fíes y fíos estudien asturianu en toles estayes educatives del CEIP Tremañes. Pa garantizalo, a l’Alministración abasta-y con asegurar un maestru qu’imparta esta materia nos Colexos Tremañes y Xove”.