L’Asociación Cultural L’Arribada convoca los Premios Timón 2013

Persones y coleutivos yá pueden presentar candidatures d’escritores pa los Premios Timón qu’entrega tolos años l’Asociación Cultural L’Arribada. Nesta ocasión opten los autores asturianos nacíos nel 1963 o n’años anteriores.

Pal 2013 va concedese’l sétimu Timón pa escritores n’asturianu o gallego-asturianu, y el cuartu p’autores en castellanu. Dos xuraos, ún por cada estaya, van encargase d’escoyer al que consideren más merecedor d’esti gallardón, que premia una trayeutoria, ente toles candidatures presentaes nel corréu electrónicu de L’Arribada: larribada@gmail.com. Los ganadores van recibir nel mes de setiembre, mientres la Vagamar, una obra del escultor y ceramista xixonés Jesus Castañón.

Los gallardonaos d’esti añu col Timón foron Antón García y Fernando Menéndez. N’ediciones anteriores ganaron el premiu Nené Losada Rico (2007),  Xuan Xosé Sánchez Vicente (2008),  Manuel García ‘El Galano’ (2009), Roberto González-Quevedo (2010) y Vicente García Oliva (2011), na estaya d’asturianu y gallego-asturiano, y Luis Fernández Roces (2010) y Juan Méjica (2011), na categoría de llingua castellana.