L’Asamblea de Docentes d’Asturianu va aconceyar el xueves con González

Alredor d’un centenar de persones axuntáronse baxo la lluvia n’Uviéu pa reclamar dignidá pa la materia de Llingua Asturiana nel sistema educativu. Los maestros van treslladar les sos demandes el xueves a la conseyera Ana González.

Dende les 18.30 hores d’ayeri, y hasta les 19.15 hores, profesores de Llingua Asturiana y Gallego-asturiano, militantes del movimientu de reivindicación llingüística y ciudadanos concentráronse na uviedina Escandalera tres la pancarta utilizada en movilizaciones anteriores que reza ‘L’asturianu, como les demás, nes escueles y oficial’, lema que los manifestantes glayaron en delles ocasiones. “Pal tiempu que fixo, con lluvia y aire, nun tamos descontentos de la convocatoria. Hubo xente y la cosa tuvo al final bastante animada”, señaló Emma Rodríguez García, de l’Asamblea de Docentes d’Asturianu. Esti coleutivu lleva trabayando dende que se conoció’l borrador de la Llei Orgánica pa la Meyora de la Calidá Educativa (LOMCE), conocida de manera popular como Llei Wert, pa que l’asignatura nun sólo nun pierda’l so espaciu actual nel sistema educativu, sinón que tamién algame un presencia digna, al igual que’l restu de llingües del Estáu.

La selmana pasada conocíase’l conteníu del tercer anteproyeutu de la LOMCE, que tien en cuenta la situación ‘especial’ del asturianu, esto ye, con reconocimientu xurídicu y presencia na educación, pero que nun ye la solución definitiva, yá que dexa la pelota nel teyáu del Gobiernu, en manes de la FSA-PSOE. “Esti documente recueye un poco la reivindicación del profesoráu y de l’Academia de la Llingua y reconoz la esistencia de llingües que nun son oficiales pero que sí tienen un marcu normativu y presencia nel sistema educativu. Nesi sen, permite, o diz, que tienen que ser ufiertaes dientro del bloque de les asignatures de llibre designación –qu’enantes nun se llamaba asina–, nel que tán tamién les llingües oficiales. Nun entra en más”, esplicó Rodríguez García, qu’añadió que “el cómo y la forma” van tar asitiaes na educación “yá nun depende de Wert nin de la la LOMCE, sinón de la nuesa conseyería”.

Al respeuto, los maestros afirmen nun saber cuála ye la postura que va caltener el Gobiernu “porque la conseyera nun fixo nenguna declaración pública hasta agora”. El xueves, a les 9 hores na sede de la Conseyería d’Educación, Cultura y Deporte, van aconceyar con ella pa treslladar les sos demandes en persona y conocer cuáles van ser los sos planes pa la materia. “Nós tenemos nidio lo que queremos nosotros. En primer llugar, valoramos la causa fundamental de too esti problemón qu’estuvo cerca de desaniciar la llingua dafechu, que ye esi estatus ‘especial’ del asturianu, esto ye, que nun ye oficial. Hai que garantizar la presencia del asturianu, non sólo nel sistema educativu, sinón en tolos ámbitos sociales, y eso namái pasa por un cambiu estatutuariu que tenga como finalidá conseguir la oficialidá”, finó Rodríguez García.

Otres demandes

Ente les otres demandes que l’Asamblea de Docentes d’Asturianu va treslladar a González destaca tamién la creación de la prometida especialidá d’asturianu, el cumplimientu de la sentencia del Tribunal Superior de Xusticia que declara illegal el ratiu mínimu d’alumnos en Secundaria y Bachilleratu pa cursar l’asignatura, y l’usu del idioma como llingua vehicular p’aprender otres materies.