L’Arzobispáu retira la potestá sacerdotal a un párrocu d'Uviéu por pasase a la política

Arturo García Rodríguez, párrocu de La Manxoya, San Esteban y Naves, va participar nes eleiciones de mayu al frente del Partido Democrático y Constitucional (PDYC). L’Arzobispáu decidió suspendelu ‘a divinis’.
 
Jesús Sanz, arzobispu d’Uviéu, trató de convencer a García Rodríguez pa que s’echara atrás nes sos intenciones enantes de tomar esta “determinación penosa”. Nestes conversaciones, l’Arzobispáu tresmitió al párrocu que considera improcedente qu’un ministru sagráu fundara un partíu políticu y que, al mesmo tiempu, concurriese como candidatu a les eleiciones del 22 de mayu “pues güei esti ye un terrén más propiu del llaicáu, nel so compromisu cristianu de tresformación de los ámbitos sociales y de participación nes estructures polítiques, que’l d’un sacerdote católicu”, aseguró nun comunicaú.
 
L’Arzobispáu señaló que’l procedimientu canónicu entamáu nun pretende otra cosa que’l bien del Presbiteriu diocesanu y el del conxuntu del Pueblu de Dios, y aseguró que’alvirtió a García Rodríguez, con respetu y claridá, de lo qu’establez la normativa eclesial y de les consecuencies canóniques que la so decisión podría tener sobre l’exerciciu del so ministeriu. Otra manera, el Partido Democrático y Constitucional va ser presentáu esti sábadu, al meudía, nel Hotel AC Fórum d’Uviéu.