L’Arribada fai públicu’l nome de los nominaos primeros a los Premios Timón nes sos trés estayes

Yá se conocen los nominaos primeros a los Premios Timón, que na edición d’esti añu estrena la categoría de ‘Cultura Asturiana’. El plazu pa presentar candidatura a los gallardones añales de L’Arribada fina’l 2 de mayu al meudía.

Los aspirantes, hasta’l momentu, pa llevar el primer Premiu Timón de Cultura Asturiana, “destináu a asociaciones, sociedaes y fundaciones con sé na nuestra comunidá autónoma que tengan como fin la conservación y promoción de la identidá cultural del país”, son la Sociedad Humanitarios de San Martín, la Fundación Belenos, l’Asociación Cultural San Tirso del Eo, la Tertulia Cultural El Garrapiellu, la Fundación Caveda y Nava y l’ Asociación Cultural Ensame Sidreru. L’Asociación Cultural L’Arribada va tener en cuenta como un méritu importante a la hora de fallar el gallardón, la difusión de la llingua asturiana y/o del gallego-asturiano nes actividaes d’estos coleutivos.

Mentes, los nominaos pal más veteranu de los trés que conformen anguaño’l Timón, el d’autores en llingua asturiana y n’eonaviego, son Lurdes Álvarez, Pablo Ardisana, Manuel Asur, Sabel de Fausta, Esther Prieto, Miguel Rojo, Miguel Solís Santos, Xosé Bolado, Milio Rodríguez Cueto, Adolfo Camilo Díaz, Ignaciu Llope, Ismael González Arias, Taresa Lorences, Lluis Xabel Álvarez, Esther García López y Ánxel Álvarez Llano. Toos ellos cumplen col requisitiu de nacer nel 1963 o n’años anteriores necesariu p’aspirar a la sétima edición del gallardón.

Por último, los escritores qu’opten al IV Premio Timón p’autores asturianos en llingua castellana –tamién naciós nel 1963 o enantes– son Fulgencio Argüelles, Carmen Gómez Ojea, Carmen Ruiz-Tilve, Pilar Sánchez Vicente, Pepe Monteserín, Francisco Álvarez Velasco, Fernando Beltrán y Juan José Plans. La entrega de premios de les trés estayes de los Timon va tener llugar, como ye vezu, mientres la Vagamar, actividá setembrina de L’Arribada. La distinción consiste nuna una obra del escultor y ceramista xixonés Jesus Castañón. 

Les persones o coleutivos que quieran presentar dalgún otra candidatura a los premios tienen de plazu pa facelo hasta’l 2 de mayu al meudía. Pa ello han d’unviar un corréu electrónicu a la direición larribada@gmail.com.