L’Arribada de los escritores inaugura les actividaes de Vagamar

Esti vienres va celebrase la inauguración oficial de Vagamar, l’actividá setembrina de l’Asociación Cultural L’Arribada. A les 18 hores ta prevista l’arribada de los escritores participantes al muelle y darréu va tener llugar un actu nel Antigüu Institutu.
 
La Banda Gaites Corvera d’Asturies va ser la responsable de guiar musicalmente’l pasucais que va llevar a los participantes en Vagamar del cai xixonés al Centru de Cultura Antigüu Institutu onde, a partir de les 18.30 hores, va tener llugar la inauguración oficial de L’Arribada 2011 con un actu nel que tamién va haber sitiu pa un un homenaxe a la narrativa del sieglu XXI y la proyeición d’un clásicu del cine n’asturianu. Asina, a les 19 hores va tener llugar la llectura de microrrellatos por parte de representantes políticos y sociales, actividá que va contar col acompañamientu musical de Pindi Díaz; y a les 20 hores la proyeición de ‘El tercer home’ (‘The third man’), doblada por Gonzali Producciones.
 
Tres esta xornada inaugural van quedar per delantre, hasta’l día 23, 29 presentaciones de llibros; trés esposiciones –en collaboración cola Fundación Vicente Ferrer, cola Oficina Municipal de la Llingua de Xixón y con Tierra Astur–; dos documentales y dos llargomatraxes doblaos al asturianu; dos recitales poéticos; ochos meses de debate nes que se van repasar dellos aspectos del estáu, futuru posible y propuestes alredor de xéneros lliterarios y la llingua asturiana; cinco actuaciones musicales; un homenaxe sentíu a Eladio Sánchez y Pilar Ibaseta, figures básiques de la Compañía Asturiana de Comedies; la entrega de los dos premios Timón a Vicente García Oliva y a Méjica; dos conferencies; y dos comunicaciones.