L’Arribada anuncia les nominaciones pa los Premios Timón del 2014

El sábadu va fallase’l II Premiu Timón de Cultura Asturiana, del que yá se conocen los nominaos. L’Asociación Cultural L’Arribada tamién fixo públicu’l nome de los aspirantes a los gallardones que reconocen la trayeutoria d’escritores.

La Sociedad Humanitarios de San Martín, la Fundación Belenos, l’Asociación Cultural San Tirso del Eo, la Xunta pola Defensa de la Llingua Asturiana y la Sociedad Popular y Cultural La Regalina son los cinco coleutivos que podríen asoceder a l’Asociación Ensame Sidreru nel palmarés d’esti premiu creáu l’añu pasáu. Dalgunos d’ellos repiten inclusive como nominaos nesti gallardón que busca premiar el trabayu de organizaciones que tengan como fin la conservación y promoción de la identidá cultural del país y qu'empleguen la llingua asturiana nes sos actividaes.

Los Premios Timón echaron a andar nel 2007 col oxetivu de reconocer la trayeutoria d’escritores en llingua asturiana y eonaviegu, resultando gallardonaos Nené Losada Rico (2007),  Xuan Xosé Sánchez Vicente (2008),  Manuel García ‘El Galano’ (2009), Roberto González-Quevedo (2010), Vicente García Oliva (2011),  Antón García (2012) y Miguel Rojo (2013). Nesta ocasión aspiren al VIII Premiu Timón escritores nacíos nel 1964 o n’años anteriores, resultando nominaos Lurdes Álvarez, Esther Prieto, Xosé Bolado, Ignaciu Llope, Esther García López y Ánxel Álvarez Llano. L’aconceyamientu del xuráu ta previstu pal 29 d’esti mes.

Una selmana enantes va dase a conocer el nome del autor ganador del V Premiu Timón p’autores en castellanu, gallardón creáu nel 2010 coles mesmes carauterístiques que l’orixinal. Los aspirantes esti añu son Fulgencio Argüelles, Tino Pertierra, Carmen Ruiz-Tilve, Pepe Monteserín, José María Ruilópez, Aurelio González Ovies, Alejandro M. Gallo, Diego Carcedo, Ángeles Caso, Pedro de Silva, Paco Ignacio Taibo II y Luis Arias Argüelles-Meres.

Los ganadores de los trés Timón van recibir el so premiu, consistente nuna obra del escultor y ceramista xixonés Jesus Castañón, el 27 de setiembre mientres la cellebración de La Vagamar 2014.