L’Arribada adelanta’l programa del Festival Lliterariu Vagamar, que va principiar el 9 de setiembre

L’Asociación Cultural L’Arribada fixo esti miércoles un adelantu del programa del Festival Lliterariu Vagamar, que va inaugurase’l 9 de setiembre. Conferencies, esposiciones, música y alderiques conformen esti eventu.
 
El Centru de Cultura Antiguu Instituto va ser, otra vuelta, la sede de Vagamar, festival lliterariu cola llingua asturiana como protagonista. El salón d’actos d’esti edificiu municipal va acoyer, a partir de les 18.30 hores del vienres 9 de setiembre, l’inauguración del certame, actu onde va facese una llectura institucional pa depués proyeutar el clásicu ‘El tercer home’, película doblada al asturianu por Gonzali Producciones.
 
Per delantre quedarán dos selmanes d’actividá casi diaria nel que les persones que s’averen al Antiguu Instituto van poder presenciar un recital de poesía o presentaciones de llibros, participar n’alderiques, ver una obra de teatru, sentir a Taranus o acudir a la entrega de los premios Timón d’esti añu a Vicente García Oliva (asturianu y gallego-asturianu) y Juan Méjica (castellanu), actu previstu pal sábadu 17 de setiembre, a les 19.30 hores. Pa desarrollar parte d’estes actividaes, L’Arribada ta acabante d’instalar una tarima nueva nel patiu del Antiguu Institutu.
 
De manera paralela al festival lliterariu, L’Arribada tamién entama dos esposiciones n’otros centros municipales. La primera, una muestra de semeyes del distritu indiu d’Anantapur que retrata la situación del país asiáticu y el trabayu que desendolca la Fundación Vicente Ferrer, va principiar el martes 6 de setiembre y va tar abierta’l públicu en L’Arena hasta’l día 26. Mentes, l’Atenéu de La Calzada va acoyer la esposición ‘Huella Astur 2011’, una recopilación de semeyes sobre la cultura tradicional asturiana que va tar a disposición de xixoneses y visitantes del 16 al 30 de setiembre.