L’arpista francés Fred Bougouin entama una xira per Asturies

Un conciertu en Xixón va abrir esti miércoles la xira de Fred Bougouin per Asturies. El músicu de Poitiers, que va tar acompañáu en dalgunes pieces por Dani García de la Cuesta, tamién va tocar l’arpa céltica en Valdés y Colunga.

La presencia de Bougouin nel país permite a los aficionaos la posibilidá de sentir esti instrumentu, non mui habitual n’Asturies. El francés, nacíu nel 1967, principió colos sos estudios d’arpa a los 6 años, averándose bien ceo al arpa céltica, distinta a la clásica que s’utiliza de manera habitual nes orquestes. Pronto comenzó a componer y a participar en dellos proyeutos con otros arpistes, destacando los Rencontres Internationales de Harpe Celtique de Dinan, xunto a Janet Harbison, Katrien Delavier o Myrdhin. Nestos alcuentros, gana’l primer premiu d’improvisación, nel añu 1993, y el segundu de composición, nel 1994. Tamién collaboró con dellos grupos de dellos estilos, ente ellos La Bandina, y acumula más de 1.200 actuaciones per toda Europa. Ente les sos innovaciones, destaca la téunica nueva na que toca l’instrumentu con uñes llargues na mandrecha y curties na manzorga.

Nesta visita nueva a Asturies, l’arpista francés va actuar nel salón d’actos del Centru de Cultura Antiguu Institutu, eventu entamáu pol Taller de Músicos de la Fundación Municipal de Cultura, Educación y Universidá Popular que va principiar a les 20 hores d’esta tarde. Pal vienres ta previstu un conciertu nuevu na sala Álvaro Delgado de Ḷḷuarca, a partir de les 20 hores, que va servir de presentación a la Xunta d’Escritores qu’entama’l Conceyu de Valdés el sábadu pela mañana na casa del Padre Galo en Cadavéu y na que Bougouin tamién va interpretar dos pieces. Nesta actividá, García de la Cuesta va presentar el villancicu asturianu del 1721 interpretáu en Madrid que recuperó recién y que tien un estribillu que s’asemeya al ‘Perlindangu de Cuideiru’. El conciertu que zarra la xira va celebrase tamién el sábadu, a partir de les 20 hores, na Sala Loreto de Colunga, actu entamáu pola conceyalía de Muyer y Cultura.