L’Archivu Históricu acueye una muestra de sellos del Conseyu Soberanu d’Asturies y Lleón

Con motivu del primer aniversariu na so sede nueva –la cárcel correccional antigua d’Uviéu–, l’Archivu Históricu d’Asturies acueye una muestra de sellos del Conseyu Soberanu d’Asturies y Lleón. Va tar abierta al públicu per un mes.
 
Germán Baschwitz ye’l propietariu d’esta coleición única que muestra sellos utilizaos pol Conseyu Interprovincial d’Asturies y Lleón (23 d’avientu del 1936-24 d’agostu del 1937) y el so sucesor, el Conseyu Soberanu d’Asturies y Lleón, que permaneció activu hasta’l 20 d’ochobre del 1937, un día enantes de qu’entraren les tropes franquistes en Xixón y Avilés. Son más de 500 sellos de temátiques distintes: la industria, la minería, el comerciu y l’aventura marítima, la pesca y la agricultura.
 
Vicente Álvarez Areces, presidente del Gobiernu, qu’acudió ayeri a los actos primeros d’aniversariu del Archivu Históricu d’Asturies, ente los que destacó la presentación d’un sellu y un matasellos conmemorativu d’esta celebración, señaló que la esposición filatélica sobre’l Conseyu Soberanu d’Asturies y Lleón ye de “un valor histórico escepcional”. “Con eses emisiones de sellos de tasa y de franquéu, Asturies pasó a tener un puestu destacáu nel ámbitu filatélicu, con mayor interés porque la so rareza acentuóse pola destrucción intencionada nos años de posguerra de la correspondencia circulada con aquellos sellos”, aseguró Areces.
 
Esta esposición, na que collabora la Federación Asturiana de Sociedaes Filatéliques, va tar abierta al públicu per un mes, según comunicaron dende esti coleutivu, nel horariu habitual del Archivu Históricu d’Asturies y Lleón. Ésti ye de 9 a 14 hores, de llunes a vienres; los martes y los xueves tamién abre peles tardes, de 15 a 18 hores. Güei, amás, va vivir una xornada de puertes abiertes con motivu del aniversariu que va completase, a les 19 hores, con una conferencia sobre la historia postal de los Conseyos Interprovincial y Soberanu d’Asturies y Lleón a cargu Germán Baschwitz, propietariu de la coleición reconocida internacionalmente.