L’ALLA y la Universidá presenten esti miércoles n’Uviéu un númberu nuevu de la coleición ‘Fontes’

‘Documentos Orixinales de los Sieglos IX-X de los Archivos del Monesteriu de San Pelayo y de la Catedral d’Uviéu’ ye’l nome del númberu 9 de la serie Fontes, coeditáu pola ALLA y la Universidá. Ésti va presentase’l miércoles n’Uviéu.
 
D’esta forma, la institución académica y universitaria continúen cola so collaboración pa recuperar testos medievales nel asturianu de la época dientro de la serie ‘Fontes de la Llingua Asturiana’, de la que ye direutora Isabel Torrente Fernández. El trabayu va presentase mañana, a les 20 hores, nel Club de Prensa Asturiana de La Nueva España n’Uviéu, asitiáu na cai Calvo Sotelo 7, nun actu nel que tamién van tar presentes, amás de Torrente, Andrea Miranda Duque, llectora y autora de los índices; Xosé Lluis García Arias, autor del estudiu llingüísticu; y Ana María Cano, presidenta de l’Academia de la Llingua Asturiana (ALLA). L’historiador Javier Rodríguez Muñoz, direutor del Club de Prensa Asturiana, va moderar l’eventu.
 
Otra manera, l’ALLA yá tien a disposición de tolos internautes el númberu 106 de ‘Lletres asturianes’ en formatu dixital. Nél pueden atopase artículos firmaos por Fernando Sánchez Miret (‘Los problemas de la diptongación del asturleonés a la luz de la Romanística’), Cano (‘L'antroponimia asturiana y el procesu de castellanización documental’), García Arias (‘La toponimia de Cantabria vista dende l'asturiana’), Martín Sevilla Rodríguez (‘Los topónimos asturianos Tamoca/Caloca’), Clara Elena Prieto Entrialgo (‘Onimia empresarial asturiana: el sector del vinu y de la sidra’), Fernando Bello Garnelo (‘Toponimia y antroponimia en la zona de Las Médulas (León)’), Xabiel Fernández García (‘Los llugares de pasu. Una aproximación antrópica cola toponimia’), José Luis González Escribano (‘La estructura de la 'frase nominal' en asturiano’), Cristina García-Sampedro Clérigo (‘Estudio codicológico sobre el Libro del Prior’), Xuan Santori Vázquez-Azpiri (‘La lliteratura de les escritores asturianes. Perspectives d'un trabayu d'investigación sociollingüística’), Nicolás Bartolomé Pérez (‘L'artículu 5.2. del Estatutu d'Autonomía de Castiella y Lleón’) y Cristóbal Ruitiña (‘La llingua asturiana na televisión autonómica. Presencia, audiencia y estándar’).