L’ALLA unvía al Conseyu d’Europa un documentu sobre’l cumplimientu de la Carta de les Llingües

L’Academia de la Llingua Asturiana anunció l’unvíu al Conseyu d’Europa d’un documentu coles sos observaciones sobre’l cumplimientu de la Carta de les Llingües n’Asturies. El testu completa la información dada na reunión de Madrid.
 
La presidenta de la institución académica, Ana María Cano, foi la encargada de tresmitir el parecer de l’ALLA sobre la situación del asturianu nel país al Comité d’Espertos de la Comisión Europea pal siguimientu del cumplimientu de la Carta Europea de les Llingües Minoritaries nun aconceyamientu celebráu en Madrid el xueves pasáu nel que tamién participaron la Xunta pola Defensa de la Llingua Asturiana, la Fundación Caveda y Nava, y l’Aconceyamientu de Xuristes pol Asturinu. En concreto, tratábase d’una reunión p’analizar el ‘III Informe sobre’l cumplimientu n’España de la Carta Europea de Llingües Rexonales o Minoritaries del Conseyu d’Europa (2006-2009)’.
 
Col unvíu d’esti documentu, de 15 páxines, l’ALLA afita tola información dada por Cano en Madrid de forma oral. “La revisión, documentada y argumentada dafechu, céntrase sobre too, arriendes de nel llabor de la propia institución, n'ámbitos como los de la vida alministrativa, el sistema educativu y los medios de comunicación”, esplica la institución académica, que tamién sorraya nel testu “les dificultaes que pal usu del asturianu nestos ámbitos remanecen de la falta d'oficialidá del idioma propiu d'Asturies”.
 
Otra manera, el diariu ‘La Opinión de Zamora’ dedica güei un reportaxe al ‘Estudiu sociollingüísticu de Zamora (fastera occidental)’ fechu por Xosé Antón González Riaño y Xosé Lluis García Arias, y espublizáu pola ALLA. Nel artículu, el periodista fai un repasu de los datos más destacaos del trabayu ellaboráu polos dos académicos y destaca “que la fala tradicional cuerre’l camín de desapaecer”.