L’ALLA propón una enmienda na Llei Wert pa que l’asturianu nun quede fuera del sistema educativu

La situación tan precaria na que quedaría la llingua asturiana cola entrada en vigor de la Llei Wert obliga a l’ALLA a mover ficha. Ana María Cano propón una enmienda de mínimos pa que l’idioma tenga presencia nel sistema educativu.

L’anteproyeutu de la Llei Orgánica pa la Meyora de la Calidá Educativa, conocida de manera popular como Llei Wert, pospón a les llingües oficiales a la categoría de materies d’especialidá y dexa práuticamente fuera de la enseñanza al asturianu, con reconocimientu xurídicu y implantación curricular, pero ensin estatus d’oficialidá. Esta situación na que s’atoparía la nuesa llingua cola entrada en vigor de la Llei llevó a asociaciones de defensa del idioma y a sindicatos y coleutivos d’enseñanza a mostrar el so refugu a la mesma, y a l’Academia de la Llingua Asturiana (ALLA) a tomar cartes nel asuntu pa garantizar los derechos llingüísticos de los asturianos. Asina, la presidenta Cano, que considera que “l’actual redaición de la Llei nun contempla la enseñanza de llingües non oficiales y malpenes ufre calces pa una situación d’enseñanza del asturianu homologable a l’actual”, convocó a los medios esta mañana pa comunicar una propuesta d’enmienda de mínimos que va treslladar en persona a la conseyera d’Educación, Cultura y Deporte, Ana González, y a la presidenta del PP d’Asturies, Mercedes Fernández, cola fin de que la llingua asturiana nun quede fuera d’escueles y institutos.

Nun primer momentu, Cano quixo dexar nidio que “l’ALLA estudia estrictamente y namái les posibilidaes d’enseñanza llingüística del asturianu”, ensin facer xuicios de valor sobre’l conteníu xeneral de la Llei, pa depués recordar que la falta de cooficialidá de la llingua asturiana “ye davezu un obstáculu insalvable pa la proteición de los derechos llingüísticos de los asturianos”, dao que la llexislación xeneral del Estáu “nun tien en cuenta situaciones xurídiques, pretendidamente ‘intermedies’, como la del asturianu”. Darréu, la presidenta de la institución académica esplicó de forma breve como configuraría la Llei Wert, tal como ta plantegada anguaño, el sistema educativu estatal, poniendo como exemplu’l ciclu de Primaria –en Secundaria y Bachilleratu se mantendría en términos asemeyaos–. Asina, en primer llugar taríen les asignatures troncales, que seríen Ciencies de la Naturalez, Ciencies Sociales, Llingua Castellana y Lliteratura, Matemátiques y la primer llingua estranxera. L’horariu escolar mínimu correspondiente a les árees del bloque d’asignatures troncales nun podría ser inferior al 50 por cientu del total.

Nel bloque de les materies especifiques, llendaes tamién, los alumnos han de cursar Educación Física y Relixón o Valores Culturales y Sociales, a eleición de pás y tutores. Amás, en función de la regulación y de la programación de la ufierta educativa qu’estableza l’Alministración y de la ufierta de los centros docentes, los escolinos han de dar al menos una d’estes dos árees d’asignatures especifiques: Educación Artística y la segunda llingua estranxera. L’horariu escolar máximo de les materies especifiques nun podrá ser superior al 50 por cientu del total. Por último, atópase’l bloque de les asignatures d’especialidá, nel que s’enmarquen les llingües cooficiales: “Tolos alumnos han de cursar Llingua Cooficial y Lliteratura naquelles comunidaes autónomes que poseen dicha llingua cooficial”. Amás, los alumnos podrán cursar como máximo otra área más nel bloque d’asignatures d’especialidá en función de lo qu’estableza l’alministración o la ufierta del centru.

“En definitiva”, con esti anteproyeutu, “la Llingua Asturiana queda fuera de la Llei”, afirma Cano, que propón amestar un testu al puntu nel que se fai referencia a les llingües cooficialies pa que l’asturianu tamién tenga güecu na normativa nueva: “Nel cau de les comunidaes autónomes con llingua propia non oficial, pero con reconocimientu xurídicu y implantación curricular, los alumnos deberán cursar Llingua y Lliteratura de la comunidá o Cultura de la Comunidá, a eleición de los pás o tutores”. Trataríase d’una “enmienda de mínimos pa que se garantice una presencia con un mínimo de viabilidá de la enseñanza de la Llingua Asturiana nes distintes estayes educatives”.

Llamáu al Gobiernu y al PP d’Asturies

Visto’l conteníu d’esta Llei y la situación tán grave na que s’atopa l’asturianu en rellación col so futuru dientro del sistema educativo, l’ALLA “fai un llamáu al Gobiernu del Principáu, al Partíu Popular d’Asturies y a les otres fuerces polítiques asitiaes na Xunta Xeneral pa qu’actúen conxuntamente col envís d’igual les posibilidaes de la enseñanza del asturianu en condiciones minímamente aceptables, acordies col Estatutu d’Autonomía p’Asturies (1981) y la Llei d’Usu del Asturianu (1998), onde ta mui claro que’l Gobiernu tien que garantizar la enseñanza de la Llingua Asturiana en toles estayes educatives”. Al respeuto, Cano afirmó que “l’Academia entiene que namái la cooficialidá de la llingua asturiana, n’ámbitos como l’educativu y l’alministrativu, puen asegurar un futuru de normalidá pa la llingua histórica d’Asturies. Los problemes actuales, y otros que xurden de contino a la hora de dignificar y usar el nuesu idioma, amuesen bien a les clares que l’actual marcu xurídicu del asturianu ye insuficiente dafechu”.

Xosé Antón González Riaño, qu’acompañó a la presidenta de la institución académica na so intervención, aseguró que, de nun se contemplar una enmienda como la propuesta pola ALLA o otra asemeyada, l’asturianu “quedaría nuna situación en precario y mui en función de decisiones coyunturales de l’alministración educativa n’Asturies; ensin rangu de llei”, situando al asturianu “nuna situación de muncha más marxinalidá de la que ta agora”. Por último, entrugada sobre la postura que caltién el Gobiernu d’Asturies nesti asuntu, Cano esplicó que la conseyera González comprometiérase “personalmente conmigo” a defender esta cuestión en Madrid y anunció que tien pendiente una entrevista cola titular d’Educación. Tamién va aconceyar cola responsable del PP n’Asturies, partíu, que, según avanzó Cano, ye sensible “a tolo rellacionao cola enseñanza de la llingua asturiana”.