L’ALLA presenta esti vienres la so propuesta normativa pal emplegu del asturianu en prensa, radio y TV

El númberu nuevu de ‘Cartafueyos normativos’ de l’Academia de la Llingua Asturiana (ALLA) va presentase mañana na sede académica. Ésti ta dedicáu al ‘Léxicu de los medios de comunicación: Prensa, Radio y TV’.
 
D’esta forma, l’ALLA espubliza’l númberu 7 de ‘Cartafueyos normativos’, una propuesta normativa de la institución “pal léxicu y les espresiones llingüístiques de los medios de comunicación, cada vegada más numberosos y complexos, qu’empleguen la llingua asturiana”. Como anunciara la presidenta, Ana María Cano, nel so discursu institucional del Día de les Lletres Asturianes d’esti añu, ésti xébrase en dos estayes: “La primera refierse propiamente al léxicu de la prensa, de la radio y de la TV, abarcando apartaos como la tipoloxía de la prensa escrita, la organización y funcionamientu del periódicu, la so estructura interna ya esterna, el léxicu xeneral del periódicu; la tipoloxía de les emisores y de la programación radiofónica, la organización y funcionamientu de la radio, el léxicu xeneral de la radio; la tipoloxía de les canales y de la programación de TV, la organización y funcionamientu de la TV o’l léxicu xeneral de la TV. Na segunda estaya úfrense les propuestes d’espresión y llocución nos medios de comunicación”.
 
La presentación d’esta ferramienta nueva, mui útil pa los periodistes qu’empleguen nel so día a día la llingua asturiana, va tener llugar mañana al meudía na sede de l’ALLA.