L’ALLA noma Académicu d’Honor a José Ramón Morala Rodríguez y homenaxea a Chechu Rubiera

|

El vienres 6 de mayu va celebrase’l XXXII Día de les Lletres Asturianes col actu académicu nel Campoamor. Nesta ocasión, l’ALLA va acoyer a José Ramón Morala Rodríguez como Académicu d’Honor y va homenaxear a Chechu Rubiera.
 
L’aniciu del actu va principiar a les 20.30 hores nel teatru uviedín cola actuación del cantante de tonada José Manuel Collado, que va tar acompañáu na gaita por Óscar Fernández González. De siguío, va celebrase una xunta estraordinaria de l’Academia de la Llingua Asturiana (ALLA) na que va acoyese a José Ramón Morala Rodríguez como nuevu Académicu d’Honor. Morala ye Doctor en Filoloxía Española pola Universidá d’Uviéu, Caderalgu de Filoloxía Hispánica na Universidá de Lleón y estudiosu de la llingua nel territoriu lleonés.
 
Nesta ocasión, la reconocencia de l’ALLA va ser pa José Luis Rubiera Vigil, conocíu nel mundu del deporte por ‘Chechu’ Rubiera. Falante d’asturianu, el ciclista ganador de dos etapes nel Giro, acompañante de Lance Armstrong nes sos victories nel Tour y agora téunicu na Federación de Ciclismu d’Asturies, va ser homenaxeáu pola ALLA pola so trayeutoria y la so defensa del idioma. Tres la intervención del de Valdornón, Ana María Cano, presidenta de la institución, va realizar la llectura del yá tradicional discursu institucional.
 
Pa zarrar l’actu, va recitase una esbilla de poemes de ‘Lletres Lliterariu’ y va actuar Xera. Darréu, va tener llugar una espicha nel Llagar Herminio de Cualloto al que pue dir cualisquier persona previa reserva, enantes del 4 de mayu, nel teléfonu 985.211.837.
 
Otra manera, l’actu académicu, actividá central de la XXXII Selmana de les Lletres, qu’esti añu ta dedicada a Manuel d’Andrés Fernández ‘Manfer de la Llera’ (1918-2005), va tar precedíu por una manifestación convocada pola Xunta pola Defensa de la Llingua Asturiana. Ésta va salir a les 19.30 hores de la Estación del Norte y va finar, como ye vezu, a les puertes del Teatru Campoamor.

Contador Estadistiques