L’ALLA llamenta y condena la marxinación al asturianu en Noreña

L’Academia de la Llingua Asturiana (ALLA) llamenta y condena la marxinación al asturianu por parte del alcalde de Noreña. Amás, pide al Gobiernu que llidere un procesu de reconocimientu xurídicu del idioma pa evitar estos casos.
 
La institución académica, tres enterese de la decisión de César Movilla, alcalde de Noreña, de refugar una moción de Conceyu Abiertu por Noreña sobre la ponte ferroviaria de Rebalde por tar escrita n’asturianu, quinxo mostrar “la so más fonda esmolición énte la falta de respetu qu’amuesa’l rexidor noreñense hacia la llingua y la cultura asturiana ya, inda más, hacia’l propiu derechu de los ciudadanos del conceyu a usar la llingua d’Asturies”. Según entienden dende l’ALLA, “refugar la mentada moción cola xida de problemes ‘reglamentarios’ da cuenta perfeutamente del allugamientu, oxetivamente antiasturianu, del Sr. Alcalde y tresllada a la sociedá asturiana, una vegada más, la necesidá de d’atayar situaciones como les descrites pente medies del reconocimientu del asturianu como llingua oficial n’igualdá de condiciones que’l restu de llingües del Estáu”.
 
Por esti motivu, píde-y al Gobiernu que llidere un procesu de reconocimientu xurídicu del asturianu y qu’actúe, mentantu que la oficialidá nun sía plenamente efeutiva, “afalando calces de dignificación y de planificación llingüística que, acordies col marcu alministrativu vixente, enconten l’usu del asturianu en toles instituciones del país”.
 
N’Ast señala que’l PSOE “sigue amosando la so esencia antiasturiana”
 
L’Asociación Cultural N’Ast tamién mostró’l so refugu pola actuación de Movilla y señaló que’l PSOE “sigue amosando la so esencia antidemocrática y antiasturiana”. “Esta actuación represiva hacia l’exerciciu d’un derechu ciudadanu por parte del conceyal de Conceyu Abiertu por Noreña, tien que contestualizase na ‘normal’ práutica caciquil del PSOE qu’ehí onde gobierna adopta un plantegamientu ‘patrimonialista’ de les instituciones despreciando tanto a la ciudadanía activa como a la realidá cultural del país”, señala’l coleutivu nun comunicáu.
 
 D’igual forma, agradez la postura del conceyal Pablo Pérez al considerar “que la meyor manera de facer pola normalización social de la llingua dende les instituciones nun consiste tanto en lleer dellos poemes nunos díes señalaos, sinón el facer un usu permanente del asturianu en tool trabayu institucional”.