L’ALLA considera “gravísimo” que’l Gobiernu pueda refugar la Especialidá Docente

L’Academia de la Llingua Asturiana muestra la so indignación pola posibilidá de que’l Gobiernu refugara la Especialidá Docente de Llingua Asturiana a consultes del Ministeriu. La institución académica considera “gravísimo” esti fechu.
 
Al traviés d'un comunicáu, l'ALLA informó nel mesmu sen nel qu'esti mesmu llunes yá lo fixera'l diputáu del Bloque por Asturies, Roberto Colunga nuna rueda prensa. Al paecer, en dambos casos remitiéronse a una información del sindicatu Suatea, según la que, la coordinadora STES, de la que forma parte la central asturiana, propunxo una enmienda nel Decretu d'Especialidaes Docentes de Maestros que prepara'l Ministeriu d'Educación pa que s'estableciere la creación d'especialidaes docentes de llingües autóctones, naquelles zones onde, nun siendo idioma oficial, hai figures de protección y solicitú pa ello, como ye'l casu d'Asturies. “A lo que paez, la respuesta del Miguel Soler García, direutor xeneral de Formación Profesional del Ministeriu d'Educación, foi qu'ello nun yera necesario porque, puestos en contautu col Principáu d'Asturies, les autoridaes autonómiques asturianes refugaben esa especialidá”, esplica la institución académica.
 
“De ser ello cierto, sedría un fechu gravísimu, non solo porque'l Gobiernu del Principáu d'Asturies taría faciendo una dexación ensin precedentes de les posibilidaes llegales de la enseñanza del asturianu, sinón tamién dende'l puntu de vista de les implicaciones que cinquen a la credibilidá del executivu asturianu, darréu que son xustamente los responsables educativos d'Asturies los qu'apregonen que tal especialidá nun pue facese porque 'Madrid nun dexa'”, continúa’ comunicáu. Pa l’ALLA, la especialidá ye “la única garantía de qu'esti profesoráu pueda acceder, n'igualdá de condiciones que'l restu, a una estabilidá profesional pente medies de los pertinentes concursos d'oposición y treslláu”, lo que significaría “un importante reblagu nel asitiamientu alministrativu del área de Llingua Asturiana dende'l puntu de vista organizativu y, mesmamente, dende la perspeutiva de la rentabilidá y axuste económicu nun momentu de crisis fonda como l'actual”.
 
Tres informar d’esta actuación tan llamentable del Gobiernu del país, los responsables de l’ALLA van solicitar un aconceyamientu urxente cola Conseyería d’Educación y Ciencia. Al mesmu tiempo, van treslladar la so opinión sobre l’asuntu a tolos grupos parlamentarios, “entamando pola FSA-PSOE, encamentando a toes elles qu'estes cuestiones seyan teníes en cuenta a la hora d'ellaborar los respeutivos programes eleutorales col envís de qu’esta llamentable situación alcuentre definitiva solución con marcu llegal y alministrativu estable y non discriminatoriu”.