L’ALLA celebra'l pieslle oficial de la UABRA cola entrega de diplomes y certificaos a los alumnos

El paraninfu de la Universidá va acoyer esti xueves el pieslle oficial de la Universidá Asturiana de Branu (UABRA), actu nel que se van entregar los diplomes y certificaos a los alumnos. Ana González tampoco nun va participar nesti eventu.

La conseyera d’Educación, Cultura y Deporte suma asina otra ausencia más nos actos venceyaos a la llingua del país a lo llargo del añu, inclusive nes actividaes de la Selmana de les Lletres Asturianes. Poro, Ana Fueyo, direutora de Política Llingüística, va ser la representante del Gobiernu nel pieslle oficial, previstu pa les 19 hores. Tienen tamién confirmada la so presencia Ana María Cano González, presidenta de l’Academia de la Llingua Asturiana (ALLA); José Luis Fontaniella, alcalde de Cangas del Narcea; y Vicente Gotor, rector de la Universidá d’Uviéu. Toos van utilizar la llingua asturiana, según señalen dende l’ALLA.

La UABRA, que celebró la so cuarta edición, desendolcóse del 29 de xunetu al 9 d’agostu en Cangas del Narcea. Nella participaron 170 persones, de les que 120 foron alumnos. Éstos van recoyer esta tarde les sos diplomes y certificaos por finar los cursos celebraos, yá sían los tradicionales ‘Cursu elemental de Llingua Asturiana’, ‘Cursu Avanzáu de Llingua Asturiana’ y ‘Cursu de Gallego-asturiano (primeira fase)', o los seis d’Afondamientu Cultural y Llingüísticu: ‘Capacitación pa la traducción al asturianu’, a cargu de Cristina Valdés Rodríguez; ‘Escuela y anovaciones n’Internet’, coordináu por David Melendi Palacio; ‘Xuegos y tradiciones populares asturianes’, empobináu por Roberto González-Quevedo González; ‘Xestión cultural n’Asturies: xestionando llingües y cultures’, con Isabel Hevia Artime como profesora; ‘El Navia-Eo: espacio, cultura y futuro’, qu'impartió José Antonio Fernández Vior; y ‘Asturies y la so historia recién’, dirixíu por Rubén Vega García. Xosé Antón González Riaño y Pablo Xuan Manzano tornaron a repetir como direutor y secretariu, de manera respeutiva, de la UABRA, na que collaboren el Conceyu de Cangas y la Universidá d’Uviéu.