L’ALLA anuncia la espublización del ‘Vocabulariu de Miranda’

L’Academia de la Llingua Asturiana (ALLA) ta acabante d’anunciar, al traviés de les redes sociales, la espublización del ‘Vocabulariu de Miranda’. Esti trabayu ye obra del fináu Xosé Álvarez Fernández ‘Pin’ y introdúcese na coleición 'Preseos'.
 
‘Vocabulariu de Miranda’ recueye’l llabor de recoyida del léxicu del conceyu asturianu de Miranda fechu por Pin, natural de Cigüedres (1948), emigrante n’Arxentina y fundador nel 1976 en Madrid de l’asociación Conceyu d’Asturies. El llibru asoléyase dientro de la coleición de l’ALLA de nome ‘Preseos’, conformando asina’l volume 13 de la mesma.
 
Na so trayeutoria, Pin destaca por ser el ganador del primer concursu de rellatos n’asturianu, entamáu nel 1973 por Luis Argüelles na so etapa de direutor del Muséu del Pueblu d’Asturies, cola obra ‘El bable de Xuanín’. Álvarez Fernández morrió na so aldea natal en xunetu del 2001.