L’ALLA abre’l plazu de matrícula pa la prueba de conocencia de xineru

Les persones interesaes en facer la prueba de conocencia de l’Academia de la Llingua Asturiana (ALLA) tienen hasta’l día 23 pa formalizar la matrícula. L’esame va celebrase’l día 25, nesta ocasión na Escuela d’Inxeniería Informática.

“L'Academia de la Llingua Asturiana, sabiendo'l fondu interés de munches persones de llograr que se reconoza la so conocencia de la llingua y manifestar asina'l so fondu amor al idioma asturianu”, ta acabante d’abrir la matrícula del primer de los dos esámenes que celebra tolos años –el segundu ye en mayu–, que sirve pa que les persones interesaes puedan algamar el documentu qu’afita la so conocencia d’asturianu nel nivel 1 o básicu. Pa ello han d’amosar un dominiu tanto de les normes llingüístiques como de la situación actual del idioma y del procesu de normalización nel que ta inxertu.

L’esame cuenta con dos partes, escrita y oral. La primera va principiar con un dictáu, pa continuar con una torna, una serie d’exercicios gramaticales y una redaición. Darréu, l’aspirante a algamar el títulu de conocencia pasará a otra sala u caltendrá una conversación breve con dalguna persona del xuráu que valorará’l so dominiu oral del idioma. Les persones interesaes en facer la prueba de conocencia tienen de plazu hasta’l xueves día 23 pa formalizar la matrícula nel horariu siguiente: de llunes a xueves, de 9 a 15 hores y de 16 a 19 hores; y los vienres, de 9 a 14 hores. L’esame va celebrase’l sábadu 25, a les 9.30 hores, na Escuela d’Inxeniería Informática de la Universidá d’Uviéu (cai Valdés Sala), nel campus uviedín de Los Catalanes.