L’alcalde de Tapia quier que l’Intercélticu algame’l títulu de Fiesta d’Interés Turísticu Autonómicu

Manuel Jesús González, alcalde de Tapia, fixo esta declaración d’intenciones na presentación del Festival Intercélticu d’Occidente (FIDO) que va celebrase del 16 al 22 d’agostu. Nél van participar más de 200 músicos.
 
González comunicó nel actu, celebráu nel salón d’actos de la Casa Conceyu, a los responsables de la Banda de Gaitas Occidente, organizadora del Intercélticu, tool sofitu municipal “yá que ye ún de los eventos más importantes que hai en Tapia y en tol occidente d’Asturias. Por ello, comprometémonos a instar ante la Conseyería competente la declaración de Fiesta d’Interés Turísticu Rexonal al FIDO, como nós llamamos al noso Festival”. Amás, destacó la meyora de la calidá del programa d’esti añu: “Creo que ye un lluxu pa Tapia tener esti Festival, que ye ún de los más importantes de música celta y sirve pa dar a conocer Tapia en tol mundu”.
 
La Noite Máxica, eventu que torna tres un parón, va ser l’eventu más destacáu del programa diseñáu pola Banda de Gaitas Occidente. Ésti va tener llugar el sábadu, a les 23.30 hores na playa’l Murallón, y “va ser dalgo mui espectacular”, señaló Martín F. Cascudo, direutor del Festival, qu’espera que’l tiempu acompañe pa que pueda celebrase. Na so intervención, Cascudo destacó la importancia que tien el FIDO pal conceyu: “Nun se pue escaecer que trayemos a casi doscientes persones que comen y duermen equí. A esa cifra hai que suma-y los cientos de persones que se desplacen a Tapia pa participar nes actividades, polo que se pue afirmar que’l Festival ye un atractivu pa la hostelería tapiega, de manera especial nesta época de crisis”.
 
La programación del Festival tien previstes más de 40 actividaes nos seis díes del eventu, nel que van participar más de 200 músicos, cinco bandes de gaites y nueve grupos folk. Como novedá pa esti añu ta la ‘Arribada del mundu celta’, prevista pal xueves, a partir de les 20 hores, nel puertu de Tapia. Ésta va consistir na llegada per mar de los músicos que participen nel FIDO, pa lo que la organización del Festival tien la collaboración de los marineros tapiegos.
 
Los participantes nesta decimoquinta edición del FIDO son la Banda Atlántida de Matamá y el grupo Corisco (Galicia), la Gibraltar Sea Scouts Pipe Band (Gibraltar), la Banda de Gaites Villa de Mieres y Bagad Cercle Ker Vourdel (Breizh), no que se refier a bandes de gaites y baille. Amás, van tomar parte los grupos Kolubara (Serbia), El Koku La Manzana, Ta Fechu, Sacava, Ayalga, Peter Browne (Eire), The Crass y Faltriqueira (Galicia), y Stolen Notes (Andalucía).