L’alcalde de Samartín del Rei Aurelio recibe a Chus Pedro

Enrique Fernández, alcalde de Samartín del Rei Aurelio, recibió esti xueves al cantante Chus Pedro con motivo de la salida al mercáu del so trabayu ‘Nenita’. El ex vocalista de Nuberu ye natural de L’Entregu.
 
Chus Pedro tuvo acompañáu de Gabino Antuña, teclista y direutor musical del trabayu, y entregó pal Conceyu delles copies d’esti trabayu compuestu por once cantares, nueve tradicionales y dos propios. El discu nuevu, el segundu en solitariu del cantante entreguín, ye “más alegre” que’l primeru, ‘De ñublu y orpín’ (2003), y ta dedicáu a la so hermana, según esplicó.
 
En ‘Nenita’ tamién collaboraron Fran Suárez (flauta trevesera), María Álvarez (acordión), Sául Quiñones (gaita sib), Raquel Castro (violín), Carlos A. García (guitarra acústica), Julio Gilsanz (guitarra acústica), Luis Rodríguez ‘Luiggy’ (baxu), Elías García (bouzouki), Diego Pangua (flautes y gaita), Nori Vigil, Tania García, Ángeles Nespral y Noelia Prieto (voces y panderetes), y el gaiteru José Ángel Hevia, qu’intervién en trés de los cantares del álbum. El discu grabóse en Piedras Blanca y ta asoleyáu por La Mula Torda, discográfica de la que ye responsable’l cantante.