L’alcalde de Noreña, el socialista César Movilla, refuga una moción por tar presentada n’asturianu

Una moción de Conceyu Abiertu por Noreña foi refugada pol alcalde, el socialista César Movilla, por tar presentada n’asturianu. Pablo Pérez esixe “la oficialidá p’acabar cola vergoñosa discriminación y represión llingüística”.
 
El propiu Movilla punxóse en contautu col conceyal de Conceyu Abiertu por Noreña pa comunica-y que la so moción sobre la rehabilitación de la ponte ferroviaria de Rebalde diba ser escluyida por tar n’asturianu. “Dixóme que nun podía almitila porque’l Reglamentu señala que tien que tar escrita na llingua oficial”, señaló Pérez a Asturies.com. D’esta forma, la moción del partíu nacionalista nun podría tratase nun de los dos Plenos estraordinarios previstos pa mañana –ún d’ellos convocáu a pidimientu de la oposición municipal–, al igual qu’otres cuatro mociones más –alegando distintos motivos– del total de seis que se presentaren.
 
Nun comunicáu, Conceyu Abierto por Noreña considea que los argumentos de Movilla “nun son válidos porque en cualesquier casu yá esiste una Llei d’Usu y Promoción de la Llingua Asturiana que nos sos artículos 3 y 4 (Llei 1/1998, d’usu y promoción del bable/asturianu) declaren, afiten y amparen el derechu de tolos ciudadanos al llibre usu del asturianu”, al igual qu’otres normes como la Consitución o la ratificación de la Carta Europea de les Llingües Rexonales o Minoritaries (BOPA de 15 de setiembre de 2001). La moción, un documentu de poques llinies na qu’amás s’axuntaba una copia d’un acta relativo al asuntu a tratar en castellanu, nun s’almitió, n’opinión de Pérez, “por cabezonería, yá que si Movilla quier sí se pue almitir el documentu n’asturianu”.
 
“L’argumentu de que l’asturianu nun ye llingua oficial utilizáu por Movilla paeznos un insultu a la intelixencia de los asturianos, pues nun debería ser necesario recorda-y que precisamente’l partíu al que pertenez, la FSA-PSOE, gobernó n’Asturies demientres más de 16 años amosando siempres el so refugu dafechu a la declaración del asturianu como llingua oficial. Tuvieron munches oportunidaes pa reformar l’estatutu y declarar la oficialidá pero nun lo fixeron”, destaca Conceyu Abiertu nel comunicáu, formación qu’esixe que l’asturianu sía oficial “p’acabar cola vergoñosa discriminación y represión llingüística” nel país. “Tocantenes a la decisión del alcalde de Noreña, sólo nos queda la dulda de si arrespuende a una estratexa común de FSA-PSOE contra la llingua d’Asturies, si más bien la so decisión tien que ver col so nulu interés en tratar en sesión plenaria l’asuntu de la ponte de Rebalde o si cenciellamente trátase de la so actitú personal reaccionaria de despreciu a los valores democráticos más elementales espresaos nesti casu contra los falantes de asturianu, lo que mos recuerda a la actitú del seleicionador d’España sub-19 Ginés Melendez” pola polémica cola bandera d’Asturies na celebración de la final del Européu de Rumanía, apunten dende la fomación nacionalista.
 
Esti actu de despreciu hacia la llingua del país de Movilla ta provocando munches reacciones nel conceyu. Según señala Pérez, el conceyal asturianista de Foro Asturias Ciudadano (FAC), Inaciu Iglesias, comunicóse con él pa tresmiti-y la so indignación pa cola actitú de Movilla nesti tema, y l’edil de Conceyu Abiertu por Noreña espera contar con más apoyos d’otres formaciones mañana nel Plenu, ente los que citó a Independientes por Noreña (IPÑ). No que respeuta a la moción en sí, la intención de los nacionalistes ye la de recuperar del so escaezu la ponte ferroviaria de Rebalde, un elementu del patrimoniu industrial asturianu que data de mediaos del sieglu XIX abandonáu a la so suerte nun prau de propiedá municipal que fai les veces de basureru. “Pedimos que se cumpla, depués de 12 años, la recolocación de la ponte nun llugar afayadizu”, asegura Pérez.
 
Nel 1999, a petición del PSOE y con Movilla como conceyal de Cultura d’URAS, tolos grupos políticos votaron a favor de la recolocación, pieza por pieza, de la ponte nun puntu del conceyu tres unes obres que afeutaron a estas estructura, pero la realidá ye qu’esto nunca se fixo. Por ello, dende Conceyu Abiertu por Noreña pretendíen facer un estudiu pa la so conservación y debatir col restu de los grupos políticos municipales la meyor ubicación posible, pa lo que la formación nacionalista proponía de primeres el prau d’una plazoleta de La Mariscala.
 
Indignación d’AXA
 
L’Aconceyamientu de Xurites pol Asturianu (AXA) tamién fixo pública al traviés d’una nota la so “indignación énte’l despreciu que l’entá alcalde amosó pa cola llingua asturiana nel fechu de refugar la moción d’un conceyal por dir escrita n’asturianu”. Al respeutu, recuerden-y a Movilla lo que diz la Llei de Promoción y Usu del Bable/Asturianu, la Constitución y la Carta Europea de les Llingües, y llamenten el xestu de “l’alcalde d’un conceyu asturianu” contra “la primer seña d’identidá del pueblu asturianu: la so llingua”.
 
Poro, los xuristes encamienten a los conceyales de Noreña a “qu’adopten les resoluciones afayadices pa desaposiar darréu del cargu d’alcalde a un suxetu que, a lo que tresciende a la opinión pública, namás s’esmuela pel sueldu y dietes que nagua por cobrar y que, a poco que-y rasquen, amuesa con xeitu autoritariu’l so enclín ideolóxicu preconstitucional”.