L’alcalde de Cangas del Narcea pide la celebración del Día de les Lletres Asturianes nel conceyu

|

José Luis Fontaniella, alcalde de Cangas del Narcea, solicitó la celebración del Día de les Lletres Asturianes nel conceyu. Foi nel piesllu oficial de la Universidá Asturiana de Branu (UABRA) celebráu nel paraninfu de la Universidá d’Uviéu.

Alredor d’un centenar de persones acudieron al actu del vienres, nel que se repartieron los diplomes y certificaciones a los alumnos que superaron los cursos de la UABRA: el ‘Elemental de Llingua Asturiana’, el ‘Avanzáu de Llingua Asturiana’ y el de ‘Capacitación en Gallego-asturiano’, amás de los cuatro d’afondamientu cultural y llingüísticu, esto ye, el de ‘Capacitación pa la traducción al asturianu’, el de ‘Internet y escuela. Nueves aplicaciones socioeducatives’, el de ‘Ecoloxía y Mediu Ambiente n’Asturies’ y el de ‘Cantares, bailles ya instrumentos musicales asturianos’. El secretariu de la UABRA, Pablo Xuan Manzano, foi l’encargáu de lleer los nomes de les persones que superaron los cursos, mentes que Vicente Gotor, rector de la Universidá d’Uviéu; Ana María Cano, presidenta de l’Academia de la Llingua Asturiana; l’alcalde Fontaniella; y Xosé Antón González Riaño, direutor de la UABRA, entregaron los diplomes y certificaos a los alumnos.

El primer edil de Cangas foi’l primeru n’intervenir tres el repartu d’acreditaciones. Fontaniella amosó’l so compromisu pa cola llingua asturiana y convidó a l’ALLA a celebrar el Día de les Lletres Asturianes nel conceyu. Amás, destacó l’apoyu a los cursos de l’Academia en Cangas, “un conceyu escaecíu poles administraciones” pola so situación xeográfica, “pero abiertu”, sobre manera nel aspeutu cultural. Nesi sen, destacó a l’asturianu “como parte de nuesa cultura y, como tal, hai que defendelu”.

Pela so parte, la presidenta de l’ALLA destacó’l “significáu especial” d’esta edición de la UABRA, al ser la tercera, y calificó a esta iniciativa de “realidá bien afitada”. “La UABRA nun ye patrimoniu esclusivu de l’ALLA”, continuó p’agradecer darréu la collaboración tanto de la Universidá d’Uviéu como del Conceyu de Cangas, ensin escaecer el trabayu del profesoráu y la bona actitú del alumnáu. D’igual forma, destacó que “caltién l’espíritu col que surdió” de recuperación de la esencia de los cursos d’estensión universitaria.

No que respeuta a la situación del asturianu na universidá, Cano faló de “cambiu de ciclu” tres l’afitamientu de la enseñanza reglada: la ‘mención’ d’asturianu en Maxisteriu, el ‘minor’ nos estudios de Filoxía y la especialidá d’asturianu nel Máster d’Educación Secundaria. La presidenta de l’ALLA agradeció a Gotor y al so equipu rectoral pola instauración d’estos estudios d’asturianu y pidió-y que punxera de la so parte pa lo que, na so opinión, ye lo más urxente anguaño: la creación de la especialidá d’asturianu. Nesi sen, destacó’l compromisu de la conseyera d’Educación, Cultura y Deporte, Ana González, y recordó que, pese a que l’asuntu nun depende de la Universidá, “la institución pue xugar un papel importante” n’algamar esta vieya reivindicación.

L’encargáu de zarrar l’actu foi Gotor, que destacó’l crecimientu y arriquecimientu na so temática de la UABRA, “adaptándose a les demandes sociales y a los temes d’actualidá”. El rector confirmó “el compromisu de la Universidá cola llingua, siempre dientro del marcu llegal que nos acueye”, y afirmó que l’asturianu ye una “parte fundamental de la nuesa cultura y de la nuesa identidá como comunidá”.

 

Contador Estadistiques