L’actu académicu del Día de les Lletres va presentar una puesta n’escena “moderna y más cercana”

9 Mayu, 2014 por Pablo R. Guardado

Inicie sesión o rexístrese pa espublizar comentarios

Asturies celebra esti vienres el XXXV Día de les Lletres con Uviéu como epicentru de les actividaes. La sociedá civil va reivindicar la oficialidá a les 19.30 hores y, darréu, va tener llugar l'actu académicu, con una puesta n'escena nueva.

Xosé Antón González Riaño ye l’encargáu de coordinar la organización de la Xunta Estraordinaria de l’Academia de la Llingua Asturiana (ALLA), prevista pa les 20.30 hores nel Teatru Campoamor. “El trabayu principia hai trés meses, yá qu’hai que dir definiendo munches coses: ver les necesidaes de l’Academia pa escoyer los académicos nuevos, diseñar el cartelu, les actuaciones musicales…”, esplica’l tamién presidente de la Universidá Asturiana de Branu (UABRA). Esti añu, amás, el llabor foi enforma más complicao pola decisión de l’ALLA de da-y una vuelta al actu col oxetivu d’averalu un poco más a la xente. “Yera muncho de ‘telón arriba, telón abaxo’ y güei vamos cambiar la puesta n’escena de forma radical. Nun se va paecer en nada a l’esquema tradicional, yá que la puesta n’escena va ser moderna, colorista y más cercana a la xente”.

Sonia Avellaneda y Próspero Morán repiten como presentadores del actu académicu nesta etapa nueva que va abrir la gaita de Jesús Fernández. El siguiente pasu va ser la celebración de la Xunta Estraordinaria, que va sirvir d’acoyida de les académiques de númberu nueves: la investigadora, profesora universitaria del departamentu de Filoloxía Española y direutora del proyectu Amper-Astur, qu'investiga la entonación n'Asturies, Carmen Muñiz Cachón, y la decana de la Facultá de Filosofía y Lletres de la Universidá d’Uviéu, Cristina Valdés Rodríguez. “A la hora d’escoyer a los académicos nuevos siempre miramos les necesidaes de la institución; nun ye un concursu de méritos. Tanto Carmen como Cristina cumplen un perfil téunicu afayadizu pal futuru inmediatu de l’Academia”, esplica’l coordinador de la organización del actu.

Ana María Cano, presidenta de l’ALLA, va lleer darréu’l so siempre esperáu discursu, pa finar con una esbilla lliteraria y l’actuación musical de Felpeyu. Según confirma González Riaño, la representación política d’esti añu nel eventu “va ser la más cualitativa y importante de toles que tuvimos hasta agora”, con presencia confirmada de la práutica totalidá de los partíos con representación parllamentaria.

‘L’Asturianu Llingua Oficial’

Una hora enantes del actu, la sociedá civil va responder a la convocatoria de la Xunta pola Defensa de la Llingua Asturiana (XDLA) pa demandar la oficialidá del idioma. La manifestación va salir, como ye vezu, a les 19.30 hores de la Estación del Norte (RENFE) pa percorrer tola cai Uría y finar frente al Campoamor, onde’l coleutivu cívicu va lleer un discursu nel que va mostrase críticu cola situación de la toponimia y la presencia de la llingua na RTPA. Pese a les nubes que cubren güei’l cielu d’Asturies, l’Axencia Estatal de Meteoroloxía da pa la hora de la manifestación unes probabilidaes de lluvia de namái'l 10 por cientu.

Día del Llibru n’Asturianu

Esti vienres, coincidiendo col Día de les Lletres Asturianes, celebráse tamién el Día del Llibru n’Asturianu, nel que participen alredor de 60 comercios del tol país. Asina, toles persones que merquen un llibru o un discu n’asturianu van tener un 10 por cientu de descuentu na compra, amás de recibir un exemplar de ‘Dibuxando un camín’, obra conmemorativa de la Selmana de les Lletres qu’incorpora cuatro histories gráfiques feches de manera especial pa esta ocasión polos ganadores del Premiu Alfonso Iglesias, esto ye Ruma Barbero, Isaac Rivero, Javier Antonio Marinas y Alfonso Zapico. Como novedá d’esti añu, la Conseyería d’Educación, Cultura y Deporte tamién fixo una edición en gallego-asturiano, disponible nes llibreríes de la zona del Eo-Navia y en Cervantes y Ojanjuren, n’Uviéu, y na Central y Cornión de Xixón, amás de la Feria del Llibru y del Discu n’Asturianu que tien llugar hasta’l domingu na Pescadería Municipal Antigua d’Avilés.

Los establecimientos que festexen del Día del Llibru n’Asturianu son Aldebarán, Antares, Casa del Libro, Cervantes (coles dos ediciones), Chemi, El Corte Inglés, Diocesana, Garluc, Maribel, Ojanguren (coles dos ediciones), Polledo, Puntos, Reconquista, San Pablo, Santa Teresa, II Milenio y Servitec, n'Uviéu; Bardos, De Bolsillo, Casa del Libro, Central (coles dos ediciones), Cornión (coles dos ediciones), El Corte Inglés, English Book Shop, Hernández, Paradiso, Roy y Mundo Sonoro, en Xixón; Azucel, Casona, Centru Niemeyer, Clarín, El Corte Inglés, Víctor Núñez, Elepé Productions y la Feria del Llibru y Discu n'Asturianu (coles dos ediciones), n'Avilés; Disco 55, La Pilarica y La Torre, en Mieres; Pablo, en Bual; Treito, en Cangas del Narcea; Imagen, en Cangues d'Onís; Mario, en Cancienes; Alfonso y Ana, n'A Caridá; Clarín, en Llanes; A. Pantiga, en Ciañu; Arvín, en La Pola Llaviana; Muséu de la Sidra, en Nava; Gestión, en Les Arriondes; Rima, en L'Infiestu; Sol, en L'Entregu; Eroski y FNAC, en Siero; Naredo y San Vicente, en La Pola Siero; Helas, en Ḷḷuarca; y Patefa, San Pedro y Casa Pérez, n'A Veiga.