L’Academia de la Llingua Asturiana da a conocer el programa de les XXX Xornaes Internacionales d’Estudiu

Los díes 8, 9 y 10 de payares van celebrase na Facultá de Filosofía y Lletres les XXX Xornaes Internacionales d’Estudiu de l’ALLA. Nesta ocasión, ponse en marcha un Conceyu Internacional de Toponimia y Antroponimia Asturiana.
 
Per trés díes, el salón d’actos de la Facultá va acoyer una cantidá importante de ponencies, charres, presentaciones y alderiques a lo llargo de tola tarde cola presencia d’espertos asturianos y de profesionales procedentes d’otros países. Asina, tres l’entamu previstu pal martes día 8 a les 16.30 hores, l’encargáu d’abrir les xornaes va ser Xavier Terrado Pablo (Universitat de Lleida) con una ponencia sobre’l ‘Léxico románico arcaico en la toponimia catalana y asturiana’. Martín Sevilla, Xabiel Fernández García, Francisco Javier Redondas Maseda, Pablo Suárez García, Xosé Lluis García Arias y Alda Rossebastiano (Università degli Studi di Torino) tamién van intervenir nesti primer día del Conceyu que va pesllase cola presentación, a partir de les 20.15 hores, de les revistes ‘Lletres asturianes 105’ (edición dixital) y ‘Ciencies. Cartafueyos Asturianos de Ciencia y Teunoloxía 1’ (revista dixital).
 
Pa la segunda xornada, los ponentes previstos son Emili Casanova (Universitat de València), Fernando Bello Garnelo, Iván Huerga Antuña, Jesús García y García, Inaciu Galán y González, Próspero Morán, Héctor García Gil y Carmen García Alayón (Universidad de La Laguna), que va averar a los presentes los rasgos particulares de la toponimia de Canarias. Por último, a les 20 hores, va presentase’l llibru ‘Toponimia hispánica. Origen y evolución de nuestros topónimos más importantes’, editáu por Casanova –que pela mañana va falar de ‘Topónimos y antropónimos valencianos explicados a través de la onomástica asturiana’– y coordináu por García Arias.
 
Por último, el xueves día 10, van intervenir Ana Isabel Boullón (Universidade de Santiago de Compostela), Ana María Cano González, Xuan Xosé Lajo Martínez, Clara Elena Prieto Entrialgo, María Dolores Gordón Peral (Universidad de Sevilla) y Stefan Ruhstaller (Universidad Pablo de Olavide). La xente interesao en matriculase pa estes xornaes han de ponese en contautu cola Academia de la Llingua Asturiana (ALLA). Toles persones qu’asistan van recibir un certificáu acreditativu.