L’Academia de la Llingua asoleya’l númberu 29 de la revista ‘Lliteratura’

El númberu 29 de la revista ‘Lliteratura’, correspondiente al iviernu 2012-2013, yá ta na cai. La espublización de l’Academia de la Llingua Asturiana (ALLA) ufre una seleición de trabayos de 13 autores y una entrevista a Pablo Texón.

Na estaya de narrativa atopamos nesti exemplar de la revista en papel dirixida por Xosé Bolado los testos ‘Oubiña’, de José Manuel Valdés Costales; ‘Tebia lluz’, de Vladimiro Suárez; y 'Negativos', d'Iris Díaz Trancho. A ellos hai que sumar el rellatu ganador del IV Premiu Arbidel de Rellatos Eróticos, ‘La marca d’agua’, de Pablo Rodríguez Medina, y el segundu premiu d’esi mesmu concursu, ‘Mientres me mires’, de Marisa López Diz. Otros cinco autores participen na seición de poesía, nesti casu Lourdes Álvarez, con ‘Certidume’, ‘Tuya’ y ‘Lupo’; Rubén d’Areñes, con ‘Odiu’, ‘Cabo de Hornos’, ‘Mapa del tesoru’ y ‘Xuben la cuesta’; Berto García, con ‘Lluz’, ‘Agua’, ‘Ferruñu’ y ‘Aire’; y Xosé Bolado, con ‘Llende’.

María Paz Fonticiella encárgase nesti númberu d’entrevistar a Pablo Texón, que fala de dellos aspeutos de la creación de les sos obres y de la so vida, y Vicente García Oliva presenta un ensayu de nome ‘Lliteratura na guerra’, escritu coincidiendo col LXXV aniversariu de la revista cultural ‘Hora de España’ (xineru del 1937-payares del 1938), qu’incorpora delles poesías espublizaes nella por autores como José Begamín, Pedro Garfias, Juan Gil-Albert, Rafael Alberti, Octavio Paz y César Vallejo. Na estaya de traducción, Antón García continúa col trabayu de torna de ‘Diecinueve poetes norteamericanos del sieglu XX’, incorporando creaciones d’Horace Gregory, Kenneth Patchen, Kenneth Rexroth, Elizabeth Bishop, Robert Creeley, John Ashbery, Adrienne Rich, Derek Walcott, Charles Simic y Louise Glück.

Pa zarrar el númberu 29 de ‘Lliteratura’, Herme G. Donis fai una crítica entitulada ‘El llar de la llingua’ del llibru ‘Toma de tierra. Poetas en lengua asturiana. Antología (1975-2010), con una escoyeta de 38 poetes fecha por José Luis Argüelles, y Pepe Monteserían protagoniza la estaya ‘Varia’ col testu ‘La espera’.